Gobierno ta lansa 'Dia Nacional pa Cuida Aruba'

ORANJESTAD – Gobierno di Aruba a anuncia oficialmente e iniciativa "Dia Nacional pa Cuida Aruba", un campaña nacional cu ta busca fortalece responsabilidad comparti pa mantene Aruba limpi. E iniciativa lo culmina cu un gran accion nacional di limpiesa riba diasabra 25 di juli, cu participacion di ciudadano, empresa, scolnan, organizacionnan y comunidadnan rond di e isla.

E anuncio a wordo haci door di Prome Minister Mike Eman, hunto cu Minister Wendrick Cicilia, representante di Serlimar, CEDE Aruba, DOW y otro partnernan. Segun Gobierno, e campaña ta sigui riba iniciativa anteriornan manera Baki den Bario y e zonanan permanente pa entrega desperdicio.

Prome Minister Eman a enfatisa cu mantene Aruba limpi no ta solamente responsabilidad di Gobierno, sino di henter comunidad. P'esey, Gobierno ta invita tur hende pa participa activamente riba 25 di juli y contribui na un isla mas limpi y atractivo.

Pa facilita e accion, diferente punto di colecta lo ta disponibel rond Aruba, mientras Ecotech lo acepta, sin costo, desperdicio entrega na e sitio permanente na Barcadera riba e dia di e campaña.

Cu e lema "P'ami. P'abo. Pa nos tur.", Gobierno ta haci un yamada pa henter comunidad uni forsa pa cuida Aruba.