MEP cu keho formal tocante acceso na vak di prensa den Parlamento

ORANJESTAD – Lider di fraccion di MEP, Evelyn Wever-Croes, a presenta un keho formal na Presidente di Parlamento, A.M. Sneek, despues di un incidente durante e reunion publico di Parlamento di 10 di juli. Segun Wever-Croes, Astrid Vries (AVP)  a tuma asiento den e vak reserva pa prensa y a haci grabacionnan di video di miembro di fraccion MEP, apesar cu posteriormente a resulta cu e no tabata representa Radio Hits 94, manera inicialmente a wordo indica durante e reunion.

Den su carta oficial, Wever-Croes ta bisa cu despues di verifica cu e propietaria di Radio Hits 94, el a ricibi un confirmacion por escrito cu Vries no ta empleado ni representante di e medio di comunicacion. Segun MEP, e situacion ta lanta preocupacion riba con acceso na vak di prensa ta wordo controla y si e procedimentonan existente ta wordo sigui.

E lider di fraccion ta argumenta cu e vaknan di prensa ta destina exclusivamente pa representante di medionan reconoci cu ta cubri e proceso parlamentario. E ta expresa preocupacion cu ta permiti personanan cu no tin status periodistico pa usa e facilidadnan por afecta e orden, seguridad y integridad di e reunionnan di Parlamento. Tambe e ta menciona cu Astrid Vries ta wordo relaciona publicamente cu un pagina di Facebook unda, segun MEP, regularmente ta aparece atakenan personal contra politicinan.

Den e keho, Wever-Croes ta pidi pa Presidente di Parlamento splica con Vries a haya acceso como miembro di prensa, cua procedimiento ta vigente pa admiti personanan den e vaknan di prensa, si tin control previo di credencialnan periodistico y cua medida lo wordo tuma pa evita repeticion di situacionnan similar. Segun MEP, ta importante cu e reglamentonan di acceso wordo aplica consistentemente pa garantiza cu parlamentario por ehecuta nan trabou den un ambiente sigur y independiente. NOTA: E potret cu ta acompaña e articulo ta un dramatisacion di e situacion.