Cambio di scol pa scolnan no-SKOA ta habri 13 te 17 di juli

ORANJESTAD – Fundacion Scol Catolico Aruba (SKOA) a informa cu mayornan cu kier cambia nan yiu for di un scol cu no ta pertenece na SKOA pa un scol di SKOA, por haci nan peticion entre 13 te cu 17 di juli. Despues di e periodo aki, solamente situacionnan extraordinario lo wordo considera pa un cambio di scol.

Pa entrega un peticion, mayornan mester presenta e siguiente documentonan:

Uittreksel di Registro di Poblacion (papel di Censo);

Copia di e kaart di AZV of seguro priva valido pa aña escolar 2026-2027;

Ultimo rapport di e alumno.

SKOA ta indica cu den aproximadamente 10 dia di trabou despues di entrega di tur documentonan, mayornan lo ricibi un contesta. Si e peticion ta wordo aproba, nan lo ricibi un carta di ubicacion pa por completa e inscripcion na e scol nobo.

SKOA ta destaca cu e ta e organisacion di educacion mas grandi na Aruba y cu ta ofrece un enseñansa di calidad halto, cu enfoke riba desaroyo integral di e alumno, balornan Catolico, comunicacion multilingual, inclusion, innovacion y actividadnan extra-curricular.

Pa mas informacion tocante e scolnan di SKOA, bishita www.skoa.aw of yama (+297) 523-1800 durante orario di oficina.