JetBlue ta amplia conexion pa Aruba via Nashville y Fort Lauderdale

ORANJESTAD – JetBlue a cuminsa un ruta nobo cu por beneficia turismo na Caribe, incluyendo Aruba. For di 9 di juli, e aerolinea ta opera tres buelo directo diario entre Nashville International Airport y Fort Lauderdale-Hollywood International Airport, creando un conexion mas facil pa viajeroonan di un di e ciudadnan cu ta crece mas rapido na Merca.

Aunle e ruta ta conecta dos ciudad den Merca, e mayor beneficio ta pa e destinacionnan di Caribe. Fort Lauderdale a bira un di e hubnan principal di JetBlue pa buelonan rumbo na Caribe, ofreciendo conexionnan facil cu Aruba, Bahamas, Jamaica, Puerto Rico, Republica Dominicana, Grand Cayman, St. Maarten y otro destinacionnan.

Segun Caribbean Journal, e ruta nobo ta habri un mercado cu ta sigui crece tanto den poblacion como den actividad economico. Esaki por trece mas turista for di Tennessee y e region di Middle Tennessee rumbo na Aruba y otro isla den Caribe cu solamente un conexion.

JetBlue ta sigui inverti den su operacion na Fort Lauderdale, unda e aerolinea ta opera casi 130 salida diario durante e verano. E compania tin e meta pa supera 150 salida diario prome cu fin di aña.

Ademas di Aruba, JetBlue ta ofrece buelonan for di Fort Lauderdale pa Nassau, Montego Bay, Kingston, San Juan, Punta Cana, Santo Domingo, Santiago de los Caballeros, Grand Cayman y St. Maarten. Mas despues e aña aki, e compania lo inicia tambe servicio nobo pa Barranquilla y Cali na Colombia.

E ruta Nashville ta forma parti di un tendencia mas amplio den aviacion, caminda aerolineanan ta fortalece hubnan grandi manera Fort Lauderdale pa conecta mas ciudad den Merca cu e destinacionnan di Caribe, en vez di ofrece buelo directo for di cada ciudad.

Pa Aruba, e desaroyo aki por representa un oportunidad pa atrae mas bishitantenan for di un mercado americano cu ta creciendo rapidamente.