Cantante conoci Bonnie Tyler a fayece cu 75 aña

ORANJESTAD – Cantante britanico Bonnie Tyler a fayece na edad di 75 aña. Su famia a confirma cu e artista a muri den un hospital na Portugal despues di un operacion di emergencia na su tripa y un periodo den coma artificial.

Naci como Gaynor Hopkins na Wales, Tyler a bira un di e cantantenan mas reconoci den mundo danki na su bos heers caracteristico y hitnan mundial manera Total Eclipse of the Heart, It's a Heartache y Holding Out for a Hero.

Su bos unico a resulta despues di un operacion na su stembanden den 1976. Apesar di e preocupacion cu su carrera tabata por caba, el a sigui alcanzando exito internacional. Su hit mas grandi, Total Eclipse of the Heart, a yega na e prome puesto den varios pais y te awe ainda ta un clasico mundial.

Den 2013 el a representa Reino Uni na Festival di Eurovision, y su ultimo album a sali na 2019. Tyler tabata biba na Portugal y ainda tabatin un serie di concierto programa pa e ultimo parti di 2026.