Thomasia (AVP) kier liderazgo clave pa futuro di KIA

ORANJESTAD – Parlamentario di AVP, Otami Thomasia, ta bisa cu modernisacion di KIA no ta trata solamente di un edificio nobo, sino principalmente di inversion den liderazgo y den e personal cu diariamente ta mantene siguridad y ordo.

Segun Thomasia, oficialnan coreccional ta enfrenta escasez di personal, exceso di overtime y hopi presion, loke por afecta e funcionamiento di e instituto. El a pidi mas apoyo, bon maneho di recurso humano y un ambiente laboral saludabel.

Tambe el a enfatisa cu rehabilitacion mester ocupa un lugar central den e vision pa futuro di KIA. Educacion, capacitacion, apoyo psicologico y tratamiento pa adiccion, segun e, ta inversionnan den seguridad publico y den reduccion di reincidencia.

Thomasia a conclui cu un KIA fuerte ta depende di liderazgo efectivo, personal motiva y un sistema cu combina disciplina cu rehabilitacion pa contribui na un Aruba mas sigur.