Encuesta: HOTFM ta mas scucha, Hits 100 FM ta mihor; radio ta sigui fuerte na Aruba

ORANJESTAD – Radio ta sigui ocupa un luga importante den bida diario di un parti grandi di publico, pero resultado di e encuesta mas reciente di NoticiaCla ta mustra tambe un mercado cu ta cambiando: musica ta domina, auto ta e luga principal pa scucha radio, YouTube ta e competidor digital mas fuerte y e perfil di participantenan ta claramente inclina na audiencia di 45 aña pa ariba. NoticiaCla a cera su encuesta riba radio emisora na Aruba cu 700 participante. E resultado ta ofrece un cuadro interesante di con publico ta consumi radio, cua stacionnan ta lidera y kico audiencia ta busca — pero tambe unda e sector tin espacio pa mehora.

HOT FM TA MAS SCUCHA; HITS FM TA WORDO CONSIDERA MIHOR

E encuesta ta revela un diferencia importante entre cua stacion di radio hende ta scucha mas y cua stacion di radio nan ta considera e miho.

Pa e pregunta tocante radio stacion mas scucha, HOT 103.5 FM ta number uno cu 16.93%, sigui pa Hits 100.9 FM cu 14.78%, Power FM 101.7 cu 13.92% y Magic 96.5 FM cu 8.03%.

Pero ora e participante mester scoge cua stacion di radio nan ta considera e mihor en general, e orden ta cambia. Hits 100.9 FM ta subi na prome luga cu 16.67%, HOT ta sigui cu 14.93%, Power cu 13.04% y Magic cu 11.30%.

E diferencia ta significativo. HOT tin e audiencia mas grandi den pregunta di scucha principal, pero Hits tin e percepcion mas fuerte como “mihor stacion”. Magic tambe ta destaca: su participacion como stacion mas scucha ta 8.03%, pero 11.30% ta considera e e mihor, locual por indica un apreciacion di marca y calidad cu ta bay mas leu cu frecuencia di scucha.

E cuatro stacionnan principal — Hits, HOT, Power y Magic — ta reuni 55.94% di tur voto na pregunta tocante e mihor stacion. E resultado ta mustra un mercado caminda un grupo relativamente chikito di emisora ta concentra mas cu mitar di preferencia.

RADIO AINDA TA UN HABITO FUERTE

Contrario na idea cu radio tradicional ta desapareciendo rapidamente, e encuesta ta mustra un nivel alto di uso. 65.07% ta bisa cu nan ta scucha radio tur dia, mientras otro 16.89% ta haci esaki entre cuatro y seis dia pa siman.

Esaki ta nifica cu casi 82% di participantenan ta scucha radio por lo menos cuatro dia pa siman.

Solamente 3.2% ta bisa cu nan casi nunca of nunca ta scucha radio.

Tambe comparando cu dos of tres aña pasa, e deterioro no ta mes grandi manera por pensa. 41.45% ta bisa cu nan ta scucha mas o menos mescos. Un total di 35.94% ta scucha mas radio, contra 22.61% cu ta scucha menos.

Dus, entre e grupo encuesta, radio no solamente ta sobrevivi: pa un grupo importante su consumo hasta a aumenta.

MUSICA TA REY

E motibo principal pakico hende ta scoge un stacion ta musica. 31.89% ta identifica musica como razon principal pa nan preferencia. Presentadornan y DJ ta sigui cu 17.17%, noticia cu 14.86% y programa di mainta cu 11.54%.

Pa e pregunta, ki tipo di contenido ta mas importante riba radio, musica ta domina ainda mas claramente: 52.46% a scoge musica. Noticia local ta na segundo luga cu 18.21% y actualidad y opinion cu 8.82%.

E mensahe pa radio emisoranan ta cla: personalidad di DJ y noticia ta importante, pero musica ainda ta e motor principal di radio na Aruba.

Mesun tempo tin un aparente contradiccion interesante. Ora puntra kico ta falta den radio local, e respuesta number uno ta mas periodismo investigativo, cu 17.27%, sigui pa “nada particular” cu 15.97% y mas profesionalismo cu 14.22%.

Esaki ta mustra cu publico por scoge stacion principalmente pa musica, pero ainda ta spera mas profundidad, calidad y profesionalismo for di e medio.

AUTO TA E REINA DI RADIO

Casi mitar di participantenan — 49.28% — ta scucha radio principalmente den auto. Cas ta na segundo luga cu 21.70% y trabou cu 14.22%.

E dato aki ta confirma cu mobilidad ta sigui un factor crucial pa radio. E momento caminda hende ta maneha pa trabou, scol of otro actividad ta keda uno di e espacio caminda radio tin un ventaja natural riba otro medio.

Pa loke ta e horario, 36.99% no tin un momento specifico pa scucha. Pero entre esnan cu sí tin un horario, 6:00 pa 9:00 di mainta ta domina cu 31.07%. Esaki ta confirma importancia di programa di mainta y e tradicional “drive time”. Despues di 9:00 anochi, solamente 0.29% ta bisa cu esey ta nan principal momento di scucha.

YOUTUBE TA E COMPETIDOR MAS GRANDI

Entre e opcionnan cu ta reemplasa radio pa esnan cu ta scucha menos, YouTube ta domina cu 30.11%. Spotify/Apple Music ta sigui cu 15.36%, Facebook cu 11.37% y television cu 6.76%.

Podcast, apesar di su crecemiento internacional, registra solamente 1.69% den e encuesta.

E resultado ta sugeri cu e menaza digital principal pa radio na Aruba no necesariamente ta podcast, sino e plataforma visual y on-demand manera YouTube, caminda e consumidor por scoge exactamente kico y ki ora e kier mira of tende.

MAYORIA TA SATISFECHO, PERO TIN SEÑAL DI ALERTA

Un total di 54.84% ta satisfecho of hopi satisfecho cu radio na Aruba. 28.43% ta neutral, mientras 16.74% ta poco of nada satisfecho.

E resultado no ta indica un crisis di satisfaccion, pero e demanda pa mas periodismo investigativo y mas profesionalismo ta un señal cu e emisora no mester ignora.

EDAD TA UN DI E RESULTADONAN MAS IMPORTANTE

E perfil di edad di e encuesta ta particularmente llamativo. 28.10% di participantenan tin entre 45 y 54 aña, 25.94% entre 55 y 64, y 19.02% tin 65 aña of mas.

En total, 73.06% di participantenan tin 45 aña of mas. Si inclui grupo di 35 pa 44, mas cu 90% tin 35 aña of mas.

Solamente alrededor di 9% di e muestra tin menos cu 35 aña.

E dato aki por tin dos señal. Por indica cu radio actualmente tin su base mas fuerte entre publico adulto. Pero tambe mester tene cuenta cu e encuesta mes tabatin un participacion mucho mas grandi di e gruponan di edad aki.

P’esey, no ta correcto conclui solamente for di e tabla general cu, por ehempel, HOT ta domina entre hobennan of cu HitsFM entre publico mas grandi. Pa determina esey mester cruza individualmente edad cu stacion preferi.

E resultado disponible sí ta laga un conclusion firme: e audiencia cu a participa den e encuesta y cu ta mustra e mayor interes den radio ta fuertemente concentra entre 45 aña y mas.

E siguiente paso importante ta analiza cua emisora ta domina dentro di cada grupo di edad. Esaki lo mustra si e liderato general di HOT, Hits y Power ta consisti entre tur generacion, of si cada stacion tin su propio nicho generacional.

UN MERCADO FUERTE, PERO CU MESTER EVOLUCIONA

E encuesta di NoticiaCla ta presenta un industria cu ainda tin forza. Radio ta wordo scucha diariamente, e auto ta keda su territorio principal y musica ta sigui e contenido numero uno.

Pero e futuro ta presenta dos reto cla: conkista audiencia mas hoben y responde na competencia di contenido on-demand.

Mes momento, e publico ta manda un otro mensahe cu radio emisoranan mester tuma na serio. Hende no ta pidi solamente mas musica; nan ta pidi mas periodismo investigativo y mas profesionalismo.

E stacion cu logra combina musica, personalidad, informacion confiabel y calidad profesional probablemente lo tin e mihor posicion pa mantene radio relevante den e añanan cu ta bin.

DISCLAIMER

Manera tur encuesta di Noticiacla, nos ta presenta nos disclaimer. Ningun momento Noticiacla ta pretende cu e resultado ta representativo pa henter Aruba, sino mas bien ta meramente un indicacion entre esnan cu ta lesa noticiacla, of cu a lesa noticiacla awor, y mas importante, cu tin aceso na internet. Asina mes, mirando e variacion demografico, e ta duna un indicacion interesante si. Keda pendiente pa e siguiente encuesta di Noticiacla, y pa esnan cu a participa, masha danki!