MEP ta pidi reunion urgente riba asistencia social

ORANJESTAD – Fraccion di MEP a presenta un peticion formal na Parlamento pa convoca un reunion urgente di e Comision Permanente di Asuntonan Social, pa trata casonan di hardship den e reglamento di asistencia social.

Den e carta firma pa parlamentario Hendrik Tevreden, MEP ta argumenta cu e ley actual por crea situacionnan inhusto pa personanan cu, pa motibonan medico of otro circunstancianan humanitario serio, mester permanese den exterior durante un periodo prolonga.

Segun informacion cu e portal aki tin, e iniciativa ta basa, entre otro, riba un caso particular di un dama Arubiano cu actualmente ta na Colombia pa ricibi tratamiento medico. Segun MEP, e dama a confronta complicacionnan cu e pago di su onderstand, pasobra su permanencia den exterior a dura mas cu e periodo cu e ley actual ta permiti, apesar cu su estadia tabata relaciona cu motibonan di salud.

E partido ta pidi pa e comision analiza si tin posibilidad pa adapta e reglamentacion of e forma di aplicacion di e ley, pa permiti excepcionnan den casonan claramente defini pa motibonan humanitario.

MEP tambe ta propone invita Ministerio di Asuntonan Social, Departamento di Asuntonan Social y otro instancia concerni pa duna mas informacion durante e reunion. Segun e partido, e asunto tin un caracter social y humanitario cu merece atencion urgente.

NoticiaCla a compronde cu Ministerio di Salud a involucra den e caso menciona anteriormente. Sinembargo, no ta conoci ainda cua resultado e intervencion ey a produci.