Cuenta anual 2025 di pais Aruba entrega na Algemene Rekenkamer

ORANJESTAD  - Minister di Finansa Geoffrey Wever, den compania di director di Departamento di Finansas Derrick Werleman, a entrega e Cuenta Anual 2025 di Pais Aruba na Algemene Rekenkamer. Entrega di e Cuenta Anual 2025 ta parti di e proceso legislativo pa responsabilisa entrada y gasto di Pais Aruba y ta representa un paso importante den fortalecemento di transparencia, disciplina y control den finansa publico. E ana aki ta e prome biaha cu a entrega e Cuenta Anual di pais Aruba asina trempan.

Durante hopi aña Pais Aruba tabatin un atraso considerable den preparacion y entrega di su cuentanan anual. Den 2025, bou di liderazgo di Minister Geoffrey Wever hunto cu Departamento di Finansa y Centrale Accountantsdienst, Gobierno a realisa un recuperacion intensivo y a entrega e Cuentanan Anual 2021, 2022, 2023 y 2024. Cu entrega di e Cuenta Anual 2025, Pais Aruba a logra elimina e atraso historico y pone e proceso di rendicion di cuenta completamente na dia.

Esaki ta nifica cu preparacion y entrega di e cuentanan anual no ta wordo trata mas como un ehercicio incidental pa recupera atraso, pero como un parti structural di un administracion financiero ordena. Di e forma aki Gobierno AVP-FUTURO ta fortalece e ciclo presupuestario y ta sigura cu entrada y gasto di Pais Aruba por wordo controla, evalua y hustifica na un forma transparente.

Algemene Rekenkamer ta encarga, conforme Constitucion di Aruba, cu control riba legitimidad, efectividad y eficiencia di entrada y gasto di Pais Aruba. Algemene Rekenkamer lo controla si e cuentanan di 2025 ta completo, si nan a keda redacta conforme e proceduranan legal y presupuestario y si e recursonan publico a wordo uza pa logra e obhetivonan stipula.

E proceduranan pa maneha y responsabilisa placa di Pais Aruba ta stipula, entre otro, den Comptabiliteitsverordening 1989. Algemene Rekenkamer lo evalua tambe si decisionnan di maneho a logra nan obhetivo na e nivel mas eficaz y eficiente posibel di uzo di recursonan publico.

Como parti di e proceso legislativo, Algemene Rekenkamer lo publica un rapport cu conclusionnan riba legitimidad, efectividad y eficiencia di entrada y gasto di Pais Aruba durante 2025. E rapport lo contene tambe recomendacionnan pa sigui mehora administracion financiero y fortalece supervision riba finansa publico.

Gabinete AVP-FUTURO ta considera entrega di e Cuenta Anual 2025 como un resultado importante den e proceso pa pone finansa publico di Aruba permanentemente na ordo.

“Stap pa stap, cu disciplina y colaboracion, nos a elimina e atraso y a restablece e proceso normal di rendicion di cuenta. Aruba mester tin un administracion financiero cu ta completo, transparente y confiabel. Esaki no ta solamente un obligacion legal; e ta un condicion esencial pa bon gobernacion y pa confiansa den maneho di fondonan publico,” Minister Wever a declara.