Trump: Conversacionnan di pas cu Iran a caba; critica Spaña y bolbe enfoca riba Groenland

ANKARA – Presidente di Merca, Donald Trump, a declara cu e proceso di negociacion pa yega na un acuerdo di pas cu Iran a caba, despues di e reciente escalacion militar entre e dos paisnan.

Durante un conferencia di prensa na margen di e cumbre di OTAN na Ankara, Trump a bisa cu no tin mas motibo pa sigui negocia cu Iran. El a usa palabranan fuerte pa describi e liderazgo iraniano y a indica cu, segun e, e dialogo diplomatico no tin futuro.

Su declaracion a sigui despues cu Merca a lansa atakenan durante anochi riba mas cu 80 blanco militar na Iran, incluyendo sistema di defensa anti-aereo, rednan di comando y instalacionnan di Guardia Revolucionario Islamico. Washington a bisa cu e operacion tabata un contesta riba tres atake reciente contra barco comercial den Estrecho di Hormuz.

Iran a responde mainta cu atakenan contra basenan militar americano na Kuwait y Bahrain.

Luna pasa, Merca y Iran a firma un declaracion di intencion cu tabata busca pa yega na un acuerdo di pas. Como parti di e proceso, tabatin un paro di fuego, pero e acuerdo a wordo viola repetidamente y e negociacionnan no a logra avansa significativamente.

TRUMP TA CRITICA SPAÑA

Na Ankara, Trump tambe a critica Spaña, y a bisa cu e pais ta un "aliado malo". El a declara cu a instrui Secretario di Tesoro Scott Bessent pa termina tur relacion comercial cu Spaña.

E tension entre Trump y gobierno di Prome Minister Pedro Sánchez ta sigui existi pa motibo cu Spaña no kier subi su gasto militar te na 5% di Producto Interno Bruto y tampoco a permiti cu Merca usa basenan militar spañol pa operacionnan contra Iran.

Gobierno spaño a contesta cu calma, indicando cu e relacionnan social, cultural y economico fuerte cu Merca lo keda mescos.

GROENLAND TA SIGUI DEN MIRA

Trump tambe a bolbe enfatisa cu Groenland tin un importancia strategico grandi pa Merca y a critica e paisnan di OTAN cu no ta sostene su posicion.

Prome Minister di Dinamarca, Mette Frederiksen, a responde cu Groenland no ta na benta y a expresa confianza cu tur aliado di OTAN lo sigui proteha e integridad territorial di cada miembro di e alianza.