Gobernador di Corsou ta fortalece relacionnan den Reino durante bishita na Hulanda

WILLEMSTAD / DEN HAAG – Gobernador di Corsou, mr. Mauritsz de Kort, a completa un bishita oficial na Hulanda cu meta di fortalece e cooperacion y relacionnan entre Corsou y Hulanda den Reino di Hulanda.

Durante su bishita, Gobernador De Kort a reuni cu Prome Minister Rob Jetten y diferente ministernan hulandes, incluyendo Defensa, Asuntonan di Reino, Asuntonan Exterior y Husticia y Seguridad. E reunionnan a enfoca riba temanan constitucional manera defensa, cooperacion hudicial, relacionnan exterior y desaroyo institucional.

Gobernador a participa tambe den e consulta 3G+ hunto cu e Gobernadornan di Aruba y Sint Maarten y Secretario di Estado Eric van den Burg, caminda a discuti desaroyonan actual y reto comun den Reino.

Ademas, el a bishita Ministerio di Asuntonan Economico, Rijksdienst voor Ondernemend Nederland, Hoge Raad, Stichting Koninkrijkszaken y De Haagse Hogeschool pa discuti cooperacion economico, emprendemento, educacion y e futuro di e relacionnan den Reino.

E bishita a termina cu asistencia na despedida oficial di Thom de Graaf como Vicepresidente di Raad van State, ceremonia unda Rey Willem-Alexander, Reina Máxima y Princesa Amalia tambe tabata presente.

Segun Gobernador De Kort, e bishita a contribui na fortalece e cooperacion y e lazonan entre Corsou y Hulanda.