Consulado di Colombia ta lansa programa gratis di salud preventivo pa comunidad colombiano na Aruba

ORANJESTAD – Consulado di Colombia na Aruba a anuncia dos iniciativa nobo bou di e programa Colombia Nos Une, cu ta enfoca riba mehora e salud preventivo di Colombianonan residente na Aruba, cu enfasis special riba esnan cu ta den un situacion vulnerabel of cu no tin cobertura medico.

Segun Paula A. Giraldo, coordinadora di Colombia Nos Une, tin aproximadamente 7.000 Colombiano cu ta biba na Aruba. Aunke hopi di nan a regularisa nan situacion migratorio, ainda tin un grupo importante cu no ta registra den e sistema local di salud.

Pa yuda cubri e necesidad ey, Consulado lo ofrece 500 limpieza dental completamente gratis pa homber, muhé y mucha. Prioridad lo wordo duna na personanan cu no tin seguro medico.

Personanan interesa por inscribi door di e pagina oficial di Facebook di Consulado di Colombia na Oranjestad. Esnan cu ta wordo selecciona lo ricibi un invitacion pa agenda nan cita y mester presenta un cedula Colombiano valido.

Ademas di e campaña dental, Consulado tambe ta prepara un di dos programa cu lo ofrece consulta medico gratis, incluyendo chequeonan preventivo, mamografianan pa muhénan y evaluacionnan general di salud pa adulto y muchanan.

Giraldo a bisa cu e iniciativa ta bay mas aya cu simplemente brinda atencion medico.

“Nos kier motiva comunidad pa busca cuido medico prome cu un problema di salud bira serio. Detecta un condicion na tempo por haci un gran diferencia,” el a declara.

E proyectonan ta forma parti di Colombia Nos Une, un programa di Gobierno di Colombia cu ta brinda apoyo, orientacion y iniciativa comunitario pa Colombianonan cu ta biba na exterior.