Defensa di Parlamentario Mike de Meza ta protesta documento di acusacion

ORANJESTAD – E ekipo legal di parlamentario Mike de Meza ta cla pa protesta e documento oficial di acusacion (dagvaarding) den e caso fiscal cu Ministerio Publico tin pendiente contra dje. Segun su abogado, mr. Desiree Croes, defensa ainda no a ricibi e documento formal cu ta indica exactamente riba cua cargo Ministerio Publico kier acusa De Meza. E caso ta sigui despues cu parlamentario Mike de Meza a rechasa un propuesta di areglo di Ministerio Publico. Den un reaccion anterior, su defensa a indica cu e propuesta no tabata basa riba fundamentonan factual y huridico corecto. Tambe nan a argumenta cu, aunke tabatin cuestionnan relaciona cu entrega laat di declaracionnan di impuesto, e declaracionnan finalmente a wordo entrega, procesa y acepta door di Departamento di Impuesto.

PROTESTA DOCUMENTO LEGAL

“E ekipo legal di parlamentario Mike de Meza ta cla pa protesta e dagvaarding (documento oficial di acusacion), mirando cu nos no ta di acuerdo cu e manera cu e proceso aki a bay,” Croes a bisa NoticiaCla. “Segun nos, simplemente no tin un caso.” Segun Croes, tur asunto di impuesto di De Meza ta na ordo. “Hasta Inspector di Impuesto a admiti esaki den Corte ora huez a puntra,” e abogado a declara.

DOCUMENTO DI ACUSACION 

E documento oficial di acusacion ta e documento formal cu ta stipula exactamente cua acusacionnan Ministerio Publico ta presentando contra parlamentario Mike de Meza. Croes a splica cu defensa a pidi e documento e mesun dia cu a wordo nenga e propuesta di arreglo cu Ministerio Publico, pero cu te ainda nan no a ricibi esaki. Mientrastanto, e caso tin fecha pa trata den Corte dia 24 di augustus. Segun Croes, defensa no tin problema cu e fecha mes. Si mester aparece e dia ey, nan lo haci esey pa demonstra cu, segun nan, no tin base pa e caso contra nan cliente.

KICO E CASO TA 

E caso contra parlamentario Mike de Meza a haya atencion publico desde aña pasa, ora a surgi cuestionnan relaciona cu su situacion fiscal y su proceso di screening politico pa bira minister. Mas recientemente, Ministerio Publico a ofrece un areglo den e caso, pero De Meza y su defensa a rechasa esey.Te ora cu Corte dicta un sentencia final, parlamentario Mike de Meza ta keda cu presuncion di inocencia.