Huez: Caso di hit & run fatal no por sigui sin abogado

ORANJESTAD – E caso penal contra e chauffeur femenino acusa di causa un accidente fatal y despues a laga e lugar di e accidente (hit and run), a haya un buelta nobo den corte diabierna. Durante e audiencia mas reciente, huez a indica cu e proceso no por sigui te ora e acusada tin representacion legal adecua, despues cu varios abogado a retira nan mes di e defensa den e caso.

DESAROYO PROCEDURAL IMPORTANTE

Segun e huez, durante e ultimo lunanan a tin varios desarrollo proceduralimportante. Corte a dicidi pa mantene e acusada den detencion preventivo, mientras cu tambe a aproba un peticion pa un investigacion psicologico y pa tende dos testigo. Sinembargo, e proceso pa tende e testigonan a wordo para temporalmente despues cu un psicologo a adverti cu e declaracion por causa un carga emocional hopi fuerte y un posible empeoracion di e estado mental di e acusado. Un di e testigonan tambe ta embarasa.

ABOGADONAN TA RETIRA SIN MOTIBO

Den mes periodo, dos di e abogado originalnan di e acusada a comunica cu nan no lo sigui represent'e, sin duna motibo. Poco despues, abogado Hulandes Moszkowicz a intenta pa wordo admiti pa participa den e defensa, pero e Corte di Apelacion a rechasa e peticion. Segun Hof, e caso no ta di un caracter excepcional cu ta haci necesario pa permiti un abogado cu no ta registra localmente, y ademas no tabatin un abogado local cu por asumi e responsabilidad exigi pa ley.

Durante su declaracion, e huez a expresa preocupacion riba e situacion actual di e acusada.

CAMINDA TA CERA PA MOSKOWICZ

"Mi ta kere cu ta bon cu bo tin un abogado. Pero manera mi ta mira e situacion awor, e caminda pa señor Moszkowicz ta sera pa e decision di e Hof." E huez a enfatisa cu ni Ministerio Publico, ni e Corte, ni mesun Moszkowicz por cambia e decision cu ya a wordo tuma door di e Corte di Apelacion. P’esey, e pregunta principal awor ta con e acusada lo sigui cu su defensa legal.

Despues di recibi un carta adicional di Moszkowicz durante e audiencia, e huez a indica cu e contenido lo wordo revisa, pero a ripiti cu e decision di e Hof ta sigui vigente. Corte kier haya claridad tocante ken lo representa oficialmente e acusada prome cu e caso por entra den un tratamiento di contenido.

Mientrastanto, e investigacion den e caso ta sigui su caminda. E resultado di e evaluacion psicologico y e decision final tocante e testigonan ainda lo tin un rol importante den e continuacion di e proceso penal.