Gerardo Figaroa ta acepta liderazgo di Aruba Lions Club pa aña leonístico 2026-2027

ORANJESTAD – Aruba Lions Club oficialmente a instala su directiva nobo pa e aña leonístico 2026-2027 durante un ceremonia celebrá den Bubali Ballroom na Embassy Suites. E acto a reuni representantenan di diferente clubnan di servicio na Aruba pa marca e inicio di un aña nobo di liderazgo y servicio comunitario.

E instalacion a wordo conduci door di ex Gobernador di Districto 35-N, Ivan Croes. Durante e ceremonia, Gerardo Figaroa a wordo instala como presidente nobo di Aruba Lions Club. Ryan Ras lo sirbi como vicepresidente, Swinda Roga como secretaria y Magaly Franken como tesorera.

Ademas di e directiva diario, Dietje Muduro y Sheila Maduro lo ocupa e posicionnan di director pa uno y dos aña, respectivamente. Mirla Koolman lo encargá di miembrocia, Vanesa Olive lo sirbi como Leo Advisor, mientras cu e presidente saliente, Edmar Lopez, lo ocupa e funcion di Lion Tamer y Twister.

Den su discurso inaugural, Figaroa a enfatisa cu e club lo guia su trabou durante e aña cu balornan manera famia, amistad, union, integridad, liderazgo, transparencia, cooperacion, motivacion, honestidad y, sobre tur, e spirito di sirbi esnan cu mas mester.

Aruba Lions Club ta forma parti di Districto 35-N, cu ta inclui Florida, Bahamas, Aruba, Boneiru y Corsou. E club ta sirbi comunidad Arubiano pa casi 80 aña y ta afilia cu Lions Clubs International, e organisacion di servicio mas grandi y mas antiguo di mundo, cu mas cu 1.4 miyon miembro repartí riba mas di 200 pais.

E directiva nobo a reafirma su compromiso di sigui traha voluntariamente pa bienestar di comunidad y a gradici pueblo di Aruba pa e apoyo continuo na diferente actividadnan y campaña di recaudacion di fondo.