Savaneta Seafood Festival 2026 lo celebra pesca local, gastronomia y cultura Arubiano

SAVANETA – Savaneta Seafood Festival lo bolbe dia 27 di september 2026 cu un programa amplio dedica na pesca local, gastronomia, cultura y entretenemento pa henter famia.

E evento, organisa pa Fundacion Savaneta Prome Capital den colaboracion cu diferente partnernan, a bira un tradicion cu ta reuni residente y bishitantenan pa celebra e herencia di Savaneta como uno di e comunidadnan di pesca mas importante di Aruba.

Bishitantenan por disfruta di seafood fresco local, diferente preparacion culinario, presentacion cultural, musica live, artesania local y actividadnan pa mucha y adulto.

Organisadornan ta indica cu e festival no solamente ta ofrece entretenimiento, pero tambe ta crea oportunidadnan pa piscadornan, comerciante y empresarionan local pa presenta y comercialisa nan productonan.

Savaneta Seafood Festival a crece durante e ultimo añanan y awor ta wordo considera como uno di e evento gastronomico y cultural mas importante di Aruba. E actividad ta pone enfoke riba e importancia di pesca local y e contribucion cu e sector ta haci na economia y identidad cultural di e isla.

Segun e organizacion, e meta ta pa sigui promove consumo di producto local, fortalece emprendemento local y crea mas apreciacion pa tradicionnan relaciona cu pesca y gastronomia Arubiano.

Mas detaye tocante programacion, artistanan y actividadnan especial lo wordo anuncia den e lunanan cu ta bin. Mientras tanto, e organizadornan ta invita comunidad y bishitantenan pa reserva dia 27 di september pa disfruta di un dia completo di sabor, cultura y entretenimiento na Savaneta.