Abogado na Venezuela ta denuncia detencion di cinco venezolano deporta for di Aruba

PUNTO FIJO, VENEZUELA – Un abogado venezolano a denuncia cu cinco ciudadano venezolano cu anteriormente a wordo deporta for di Aruba, ta wordo manteni den detencion di forma arbitrario na Venezuela, apesar cu autoridadnan arubiano a libera nan y a deporta nan solamente pa violacion di ley migratorio.

E CASO

Segun abogado Kerrins Mavarez, su clientenan – cu tin entre 22 y 55 aña di edad – a sali di Colombia rumbo pa Aruba riba un lancha na 28 di januari buscando un mihor futuro. Ora nan a yega cerca di Aruba, varios di nan a bula den awa cu intento di drenta e isla nadando. Siete di e migrantenan a wordo intercepta pa autoridadnan arubiano, mientras cu otronan a logra drenta ilegalmente na e isla.

LIBERA NA ARUBA Y DESPUES DETENI NA VENEZUELA

Segun Mavarez, e siete hombernan a wordo libera completamente na 5 di maart door di autoridadnan arubiano. Ademas, nan a ricibi un orden di deportacion y un prohibicion pa drenta Aruba atrobe. Despues cu nan a reuni suficiente placa pa paga nan pasashi di regreso, e hombernan a bolbe Venezuela durante luna di april. Na principio, nan a pasa sin problema door di controlnan migratorio y di Interpol na aeropuerto na Venezuela. Segun e abogado, esey tabata pasobra nan no tabatin ningun antecedente criminal y nan unico falta tabata e intento di drenta Aruba ilegalmente den un lancha. Sinembargo, segun e relato, ora cinco di nan a sali for di aeropuerto, nan a wordo deteni pa miembro di Guardia Nacional Bolivariana (GNB).

ACUSACION DI NARCOTRAFICO

Awor e cinco hombernan ta enfrenta acusacionnan di narcotrafico y asociacion criminal na Venezuela. Mavarez ta sostene cu e acusacionnan no tin base legal. Segun dje, Aruba nunca a investiga ni acusa su clientenan di algun delito relaciona cu droga. “Abo no por deporta un persona si e ta envolvi den un investigacion criminal. E documentonan oficial di Aruba ta confirma cu nan a wordo libera completamente y cu no tabatin ningun investigacion penal contra nan,” e abogado a declara. E  la alega tambe cu autoridadnan venezolano a confisca y   desaparece e documentonan di liberacion cu Aruba a entrega na e migrantenan. Segun dje, posteriormente nan a logra obtene copia di e documentonan gracias na e abogado cu a representa nan na Aruba.

FAMIA TA PIDI HUSTICIA

E abogado tambe a critica cu e evidencia presenta contra su clientenan ta basa principalmente riba un articulo periodistico publica na Aruba tocante un lancha cu a yega na e isla cu droga y migrantenan venezolano. Sinembargo, e la enfatisa cu na e momento cu e incidente cu droga a tuma lugar, e cinco hombernan ya tabata deteni na Aruba y no tabata conecta cu e caso. Recientemente, tres di e cinco sospechosonan a wordo transferi pa un prizon na Coro, capital di estado Falcón, mientras cu e otro dos a keda den custodia di Guardia Nacional. Famianan di e detenidonan ta insiste cu nan sernan no ta criminal. “Nan kier traha so, tin stabilidad y progresa den bida. P’esey nan a bai Aruba buscando un mihor futuro. Nan no ta culpabel di loke nan ta acusa nan,” un familiar a declara na e medio digital Crónicas del Caribe. Segun Mavarez, e caso lo wordo presenta na e comision nacional recientemente crea pa reforma di sistema di husticia penal na Venezuela.