Conseho di Europa ta mantene Corsou bou supervision reforza

WILLEMSTAD – Corsou ta sigui bou supervision reforza di Conseho di Europa debi na deficiencianan den tratamiento di prizoneronan cu condena pa bida y cu problema psikiatrico serio. Segun un informe reciente di Ministerio Hulandes di Asuntonan Exterior, ainda no a cumpli completamente cu un sentencia anterior di Corte Europeo pa Derecho Humano. E caso ta trata di James Clifton Murray, cu a wordo condena na 1980 pa asesinato di un mucha muher di seis aña. A pesar cu autoridadnan tabata sa desde e momento ey cu Murray tin problema psiquiatrico serio y cu el tabata necesita tratamiento, durante su detencion na Corsou y Aruba e cuido necesario no a wordo brinda. Na 2016, Corte Europeo pa Derecho Humano a conclui cu Reino Hulandes a viola derecho humano di Murray, pasobra sin tratamiento adecuado el practicamente no tabatin ningun perspectiva di eventual liberacion. Pa e motibo ey, na 2024 e caso a wordo coloca bou supervision reforza di e Conseho di Europa.

MAS ATENCION PA CUIDO FORENSE

Gobierno Hulandes a informa cu diferente medida a wordo tuma pa mehora circunstancianan den prizon y cuido forense, pero cu ainda tin hopi trabou pendiente. Como resultado, den marco di Consulta Cuatro Partinan di Husticia, ta wordo desaroya un programa multi-aña pa fortalece cuido forense den Caribe Hulandes. Entre e planonan tin e posibilidad pa crea un facilidad chikito di tratamiento forense cu por sirbi Aruba, Corsou, Sint Maarten y e islanan BES.

Riba 3 di december 2025, e caso a wordo discuti atrobe den Conseho di Europa. Durante e reunion, Minister di Husticia di Aruba y Minister Plenipotenciario di Corsou a participa personalmente pa duna aclaracion tocante e progreso logra. Segun e informe, supervision internacional lo sigui vigente te ora autoridadnan demuestra cu suficiente mehoracion a wordo implementa den e sistema.