PPA ta duna Gobierno plazo pa mustra base legal di contrato di Afl. 2,1 miyon

ORANJESTAD – Fraccion di PPA a formalisa su preocupacion tocante e contrato di Afl. 2,1 miyon financia via Aruba Tourism Authority (ATA) y a manda un carta oficial na Conseho di Minister solicitando documentacion cu demostra e base legal di e proceso.

Lider di fraccion Eduard Pieters a aclarea cu PPA no ta contra e proyecto di recogemento di desperdicio, pero ta exigi cu Gobierno demostra cu e procedemento a sigui conforme ley. “Si tur cos ta corecto, mustra e documentonan,” Pieters a bisa.

PPA ta cuestiona principalmente cuater aspecto: e posible instruccion formal di minister na ATA bou di articulo 20 di e ley di ATA; si a sigui e procedimiento di destaho publico conforme articulo 21; si e proyecto ta cay dentro di e meta legal di ATA; y si e proceso a cumpli cu principionan di transparencia, igualdad di oportunidad y bon gobernacion.

Segun Pieters, durante e reunion publico den Parlamento Gobierno a duna diferente splicacion verbal, pero ainda no a presenta e documentacion cu, segun PPA, mester sostene e decision. E partido ta solicita entre otro documentonan di destaho, e ministeriele beschikking y otro actonan administrativo relevante.

Pieters a indica cu Gobierno ta haya oportunidad pa aclarea of, si necesario, coregi e proceso. Si e documentonan confirma cu tur procedimiento a wordo sigui, PPA ta considera e cuestion legal aclarea. Pero si Gobierno no por demostra e base legal, e mester splica con e situacion lo wordo remedia.

“E fin no ta hustifica e medio,” Pieters a bisa, enfatizando cu un proyecto positivo tambe mester cumpli cu ley. PPA lo analisa e contesta oficial di Gobierno prome cu determina su siguiente paso parlamentario of legal.