Falta di kamber ta pone studiantenan di Aruba mas vulnerabel pa fraude na Hulanda

DEN HAAG – E problema persistente pa haya un kamber na Hulanda ta pone studiantenan di Aruba den un posicion cada bez mas vulnerabel, mientras fraude cu anuncio falso di kamber ta aumenta riba plataforma manera TikTok.

Investigacion di NOS Stories a descubri centenares di anuncio falso pa kamber di studiante y cas di huur riba TikTok. Estafadornan ta copia potret di propiedadnan verdadero, entre otro for di Pararius, y despues ta pidi victima paga placa adelanta pa un bezichtiging, reservacion of borg pa un kamber cu den realidad no ta existi.

E riesgo ta particularmente relevante pa studiantenan di Aruba, kende caba ta enfrenta un mercado di vivienda sumamente dificil na Hulanda. Arubahuis na Den Haag ta confirma cu tin un escasez grandi di vivienda pa studiante y ta conseha studiantenan cuminsa busca y registra pa un kamber un of hasta dos aña prome cu nan estudio.

Gobierno di Aruba incluso a inicia e proyecto “Studentenkamer” despues cu Arubahuis a alarma tocante e falta serio di kamber pa studiantenan Arubano na Hulanda.

E combinacion di poco oferta y hopi demanda ta crea tereno ideal pa estafadornan. Studiantenan cu ta desespera pa haya un lugar prome cu nan salida for di Aruba por wordo tenta pa paga rapidamente ora nan haya un oferta aparentemente atractivo.

Segun e informacion presenta door NOS, Fraudehelpdesk a ricibi 175 denuncia di persona engaña mediante anuncio di huur durante prome mitar di 2026, compara cu apenas 21 den e seis lunanan anterior.

Señalnan di alarma ta inclui un propietario of “makelaar” cu ta exigi pago inmediato, ta pidi borg prome cu un bezichtiging, of ta evita repetidamente pa mustra e propiedad.

Pa studiantenan di Aruba e mensahe ta specialmente importante: no laga presion pa haya un kamber bira motibo pa manda placa sin verifica e propiedad y e persona of compania cu ta ofrece esaki.