Ministerio, DEA y scolnan MAVO ta evalua maneho di revisie y curriculum

ORANJESTAD — Ministerio di Educacion, Departamento di Enseñansa Aruba (DEA) y directornan y docentenan di scolnan MAVO ta participa den un serie di consulta durante september y oktober pa evalua y harmonisa e maneho di MAVO na Aruba.

Segun e informacion divulga pa minister Gerlien Croes, un punto central ta e maneho di revisie den enseñansa secundario. E meta ta pa e procesonan aki ta transparente, husto y uniforme den tur scol MAVO.

E reunionnan tambe ta enfoca riba fortalecemento di curriculum y preparacion di studiantenan pa sigui nan estudio na EPI of HAVO, of pa drenta mercado laboral. Ademas, e participantenan lo trata e retonan diario di scolnan y docentenan, metodologianan moderno y digitalisacion.

E consulta ta forma parti di Learning Cities Aruba – Hunto nos tur ta crece. E comunicado no ta anuncia ainda cambionan concreto of un fecha pa introduci un maneho revisa.