Dowers: Scarsedad di personal na Recherche ta haya atencion prioritario

ORANJESTAD – Ministro di Husticia, Arthur Dowers, a confirma cu e scarsedad di personal den Departamento di Recherche ta un asunto cu tin su completo atencion y cu ya tin accionnan den marcha pa reforza e capacidad di e departamento.

Durante un bishita reciente na Departamento di Recherche na Wayaca, Dowers a reuni cu funcionarionan pa papia, entre otro, tocante e falta di personal cu e departamento ta enfrentando. Segun e ministro, varios rechercheur a baha cu pensioen of a progresa den nan carrera dentro di Cuerpo Policial Aruba, mientras cu durante varios aña no tabatin reclutamento di polisnan nobo, situacion cu a contribui na e falta actual di personal.

PERSONAL CAPACITA

Dowers a indica cu dentro di Cuerpo Policial Aruba tin personal capacita cu por wordo transferi pa Recherche pa yuda fortalece e equipo. El a revela cu algun siman pasa caba el a duna instruccion na liderazgo di KPA pa percura cu tin suficiente rechercheur disponibel pa atende e creciente cantidad di casonan cu e departamento ta maneha.

SEGURIDAD PA CIUDADANO 

"E ciudadano cu ta entrega un keho mester tin e seguridad cu su caso lo haya e atencion necesario," Dowers a enfatisa, añadiendo cu ta trahando hunto cu e direccion di KPA pa identifica y implementa solucionnan cu rapidez.

KEHO DI MINISTERIO PUBLICO 

E ministro tambe a reacciona riba reciente declaracionnan di Ministerio Publico, den cual a wordo menciona cu e falta di personal na Recherche tabata relaciona cu recortenan presupuestario. Segun Dowers, e recortenan a wordo aplica exclusivamente riba gastonan di bienes y servicio, y no riba personal.

Al contrario, Dowers a señala cu durante su prome aña como ministro na 2025, gobierno a inicia reclutamento di aspirantenan pa polis, y cu den prome mitar di 2026 otro grupo nobo di aspirante a wordo recluta no solamente pa KPA, sino tambe pa KIA. E la agrega cu mas proceso di reclutamento ta na caminda.

Ministerio di Husticia, segun Dowers, lo continua tuma medidanan concreto pa fortalece e capacidad operacional tanto di Recherche como di Cuerpo Policial Aruba, cu e meta di mehora e servicio na comunidad y reforza seguridad publico.