Hof ta condena sospechoso na Sint Maarten pa fraude di impuesto y labamento di placa

WILLEMSTAD – Hof Comunal di Husticia di Aruba, Corsou, Sint Maarten y e islanan BES a condena un homber di Sint Maarten pa fraude di impuesto y labamento di placa, despues cu a wordo comproba cu Gobierno di Sint Maarten a perde mas di ANG 700 mil den entrada di impuesto.

E sentencia, publica riba 6 di maart 2026, ta confirma cu e sospechoso, hunto cu un otro persona, tabata responsable pa entrega declaracionnan incorecto di impuesto di entrada y omzetbelasting via dos compania cu nan tabata maneha. Tambe a wordo comproba cu e sospechoso no a entrega su propio declaracion di impuesto di entrada dentro di tempo.

Ademas di fraude fiscal, Hof tambe a declara comproba labamento di placa di dos auto cu un balor conjunto di USD 119 mil.

Segun e caso, e sospechoso anteriormente ya tabata condena pa un hecho similar na 2017. A pesar di e condenacion anterior y un periodo di prueba di tres aña, e la sigui comete delito fiscal, algo cu Hof a considera como un factor agravante.

Durante e apelacion, Ministerio Publico y e defensa a yega na acuerdo procesoral, unda e sospechoso a acepta varios condicionnan, incluyendo no presenta oposicion adicional y coopera cu proceso hudicial. Como resultado, Ministerio Publico a pidi un condena di 21 luna di prison sin condicion.

Inicialmente, e condena tabata 22 luna, pero Hof a reduci castigo cu un luna pasobra e proceso hudicial a dura demasiado tempo, loke ta considera un violacion di “termino razonabel” den procedimiento penal.

Hof finalmente a condena e sospechoso na 21 luna di prison incondicional. Tambe a dicidi no ehecuta un condena condicional anterior di 18 luna, tumando na consideracion e cooperacion actual di e sospechoso y e edad di e caso anterior.

Segun Hof, fraude fiscal di e magnitud aki no solamente ta causa daño financiero na Gobierno, pero tambe ta afecta confianza den sistema fiscal y husticia di Sint Maarten.