Air Transat lo cuminsa cu buelonan directo entre Montreal y Aruba na december 2026

ORANJESTAD – Compania di aviacion Air Transat a anuncia cu lo cuminsa ofreci buelonan directo entre Montreal y Aruba cuminsando 12 di december 2026 te cu 3 di april 2027. Noticiacla tabata e prome pa raporta noticia riba e intencion di e aeroliña pa cu Aruba. 

E buelonan entre Montreal y Aruba lo opera cada diasabra y e trayecto lo dura aproximadamente 5 ora y 20 minuut. E buelo directo lo conecta Montreal cu Aeropuerto Internacional Reina Beatrix na Oranjestad.

Segun Air Transat, e ruta seasonal nobo aki ta dirigi riba bishitantenan cu ta desea pasa un siman of mas na Aruba durante temporada di winter. Compania a destaca cu Aruba ta conoci pa su playanan di santo blanco, arquitectura colorido di estilo Hulandes y su posicion geografico pafor di e area di horcan.

Air Transat a describi Aruba como un destinacion ideal den Caribe pa disfruta solo durante henter aña. “No ta pa nada cu nan ta yama Aruba ‘One Happy Island’,” e compania a menciona den su anuncio oficial.

E conexion directo cu Montreal ta representa un paso importante pa turismo di Aruba, habriendo mas oportunidad pa bishitantenan di Canada bishita isla durante temporada halto.