OM a pidi 3 aña di prizon pa Otmar Oduber den apelacion di caso Flamingo

ORANJESTAD – Caso Flamingo a drenta un fase decisivo diamars, ora Procurador General (PG) den Corte di Apelacion a exigi un castigo di 3 aña di prizon incondicional contra ex-minister Otmar Oduber. Ademas, PG a pidi cu Oduber no por ocupa ningun cargo gubernamental pa un periodo di 6 aña.

E CASO

Caso Flamingo, cu a sacudi panorama politico di Aruba durante añanan, ta gira rond di acusacionnan di corrupcion, fraude y abuso di posicion publico durante e periodo cu Oduber tabata minister. E investigacion a cuminsa varios aña pasa y finalmente a conduci na condena den Prome Instancia, cu awor ta siendo revisa den apelacion.

APELACION

Durante e audiencia reciente, atencion no solamente a enfoca riba e exigencia di castigo, sino tambe riba reaccion emocional di Oduber. Noticiacla a raporta dialuna cu ex-minister a bira hopi emocional durante e tratamiento di caso y a yora den sala di audiencia despues di menciona fallecimento reciente di su mama. E episodio a move Corte pa suspende tratamiento temporalmente pa permiti cu Oduber recupera. Pa loke ta e defensa di Oduber, esaki lo cuminsa diahuebs awor. 

OTRO SOSPECHOSONAN

Pa e otro sospechosonan den e caso, Procurador General tambe a presenta su exigencianan. Contra Wever, Ministerio Publico a pidi 240 ora di trabao comunitario, of alternativamente 120 dia di prizon, hunto cu un castigo condicional di 6 luna y un periodo di prueba di 3 aña. Pa Esser, PG a exigi 18 luna di prizon.

CORUPCION

E caso ta sigui wordo considera un di e expediente di corrupcion politico mas importante den historia reciente di Aruba. E decision final di Corte di Apelacion lo determina si e condenanan anterior lo keda na vigor, wordo modifica of wordo elimina. Resultado di e apelacion ta wordo spera cu gran interes tanto door di sector politico como door di comunidad, pasobra e por tin consecuencia importante pa futuro di e involucradonan y pa confianza publico den gobernacion y integridad gubernamental.