Arubahuis presente na final di 4Daagse di Nijmegen

DEN HAAG – Arubahuis tabata representa na e ultimo dia di e famoso 4Daagse di Nijmegen, despues di un invitacion oficial di Stichting Vierdaagse. Representando Aruba tabata e oficial di Public Relations, Sidney Kock, durante e edicion numero 108 di e tradicional evento di canamento.

For di e tribuna VIP, Kock por a sigui e miles di participante cu a completa nan ultimo meternan riba e conoci "Via Gladiola", unda nan a haya un caluroso recibimento di miles di  spectador, musica y ambiente festivo.

Diferente banda di musica y fanfarianan, incluyendo grupo militar, di polis y di PostNL for di Hulanda, manera tambe participantenan di otro paisnan manera Reino Uni y Suecia, a contribui na e celebracion.

Durante e evento, Kock tambe a saluda varios Arubiano cu a participa den e caminata. Entre nan tabata Glenny Yarzagaray, kende a completa e Vierdaagse pa e di 38 biaha.

Aruba tambe tabatin representacion for di Aduana Aruba. Marlon Ruiz y Gio Davelaar a participa den e caminata hunto cu Douane Nederland.

Nota: E potretanan a wordo facilita door di Arubahuis.