Tour Operators Uni ta exigi control urgente despues di accidente fatal cu UTV

ORANJESTAD — Tour Operators Uni ta lamenta e accidente fatal cu un UTV cu a tuma lugar diadumingo atardi na altura di Grapefield y cu a cobra bida di un hoben Hulandes. Segun e organisacion, algun guia di tour tabata testigo di e accidente.

Tour Operators Uni ta enfatisa cu, segun informacion disponibel, e vehiculo no tabata forma parti di un tour organisa. Nan ta señala cu un tour organisa normalmente ta conta cu un guia licencia, vehiculonan registra y rutanan conoci.

Segun informacion cu representantenan di e sector a ricibi di coleganan na e sitio, e conductor lo a trata di haci un maniobra cu e UTV prome cu e accidente. E organisacion ta condena comportamentonan manera velocidad halto, drifting y “donuts” cu UTV.

“Velocidad halto, drifting of donut cu tur tipo di vehiculo, especialmente UTV, ta cosnan cu nos ta condena y ta precisamente pa e motibo aki nos ta urgi control den nos sector,” Tour Operators Uni a declara.

E organisacion ta bisa cu durante hopi tempo e sector ya ta pidi atencion pa UTV y ATV cu, segun nan, ta opera sin cumpli cu tur regla y ta circula den costa noord.

Pa Tour Operators Uni, e dialogo cu actualmente ta andando entre Gobierno, sector y otro stakeholder ta importante, pero no ta suficiente solamente cu papia. Nan ta pidi accion urgente y control efectivo pa evita mas accidente.

E organisacion ta keda disponibel pa autoridadnan cu cualkier informacion cu por yuda den investigacion y, na nomber di operadornan y guianan local, a manda condolencia na famia y conocirnan di e victima.