Apelacion: Hof a cuestiona caso Flamingo, ex minister Oduber a bira emocional den Corte

ORANJESTAD – Emocionnan fuerte a domina dialuna den Corte di Apelacion durante tratamiento di caso Flamingo, unda ex-minister Otmar Oduber a yega na punto di cuminsa yora mientras cu Hof tabata cuestion’e intensamente tocante varios acusacion serio di corrupcion, abuso di poder y malversacion. Tratamento di e caso, cu a cuminsa 10’or di mainta, a dura te despues di cinco’or y mei di atardi. Durante diferente momento di e sesion, por a nota cu Oduber tabata reacciona emocionalmente riba preguntanan di Hof. Na un momento particular, e la stop di contesta y a pidi disculpa pa su reaccion, mientras cu e la bisa cu recientemente e la dera su mama y cu e proceso largo di añanan a causa hopi dolor, frustracion y incertidumbre den su bida. “Ta añanan caba mi ta biba den incertidumbre,” Oduber a expresa entre lagrima. E reaccion emocional a toca e tres hueznan di Hof, kende a expresa condolencia y a dicidi di para e audiencia temporalmente pa duna Oduber oportunidad pa trankilisa. Su abogadonan, mr. Carlo y mr. Ellis, a bay cerca dje pa consola’e.

CASO MALMOK

Den e caso Malmok, Ministerio Publico ta sospecha cu Oduber y ex-funcionario Wever a participa den dunamento irregular di dos tereno na Malmok. Acusacion ta cu Oduber a abusa di su posicion como minister pa facilita otorgamento di tereno, mientras cu Wever lo a falsifica cartanan oficial.

Oduber a rechasa tur acusacion categoricamente y a insiste cu tur procedura a sigui segun un maneho nobo cu e la implementa durante su periodo como minister. Segun e, e sistema anterior tabata desorganisa y permiti influencia directo riba peticionnan di tereno. E la bisa cu su maneho tabata crea mas transparencia y cu minister no tabata interveni directamente den procesonan.

Wever, pa su banda, a declara cu e la sigui instruccionnan administrativo y cu tur accion a wordo haci den marco di su trabou como coordinador.

Hof, sin embargo, a enfoca riba e hecho cu cierto peticionnan no a sigui e procedura normal. Particularmente, e caso di dos persona, identifica como F. y C., a bira punto central di cuestionamento. Oduber a argumenta cu tabatin un “excepcion” den e maneho pasobra no tabatin tereno chikito disponibel mas y Gobierno a dicidi pa considera terreno mas grandi tambe.

Segun Hof, e supuesto maneho di excepcion nunca a wordo publica oficialmente ni inclui claramente den documentacion oficial. Situacion a cambia parcialmente ora abogado mr. Odor a presenta un documento di december 2020 cu, segun defensa, ta confirma existencia di e maneho menciona door di Oduber. Hof a indica cu ni e Procurador General ni Hof tabatin conocimiento previo di e documento.

ODUBER A BIRA EMOCIONAL

Tension den sala a subi ainda mas ora Hof a sigui cuestiona con cierto peticion a move rapidamente entre oficina ministerial y DIP. Na e momento ey, Oduber a perde su emocion y a cuminsa yora den Corte.

E la enfatisa cu nunca el personalmente a duna orden pa favorece cualkier persona y cu decisionnan tabata wordo tuma den reunion cu diferente departamento. E la ripiti cu recientemente su mama a fayece y cu e presion emocional di e caso ta afecta’e profundamente.

EMPLEADONAN “FANTASMA”

Otro punto fuerte den e audiencia tabata acusacion cu Oduber lo a pone dos persona, Phillips y Tiel, den servicio gubernamental sin cu nan realmente tabata traha. Ministerio Publico ta sospecha cu esaki por constitui malversacion y abuso di autoridad.

Oduber a rechasa acusacionnan y a bisa cu tur contratacion a sigui procedura normal via DRH. E la insisti cu ambos persona realmente a traha y cu e acuerdonan di trabou tabata legitimo. Hof, sin embargo, a mustra cu documentacion no ta specifica claramente e funcionnan cu nan tabata ocupa.

Tambe a sali na cla cu ex-minister Marisol Tromp anteriormente a cuestiona e contratonan y a expresa cu e trahadornan no tabata presenta pa trabou. Hof inclusive a menciona cu un huez civil anteriormente a cuestiona validez di e acuerdonan y a considera esakinan como posible patronahe politico.

ACUSACION CONTRA ESSER

Den otro parti di e caso, Hof a trata acusacion contra Esser, kende ta sospecha di yuda simpatizante politico haya trabou na DOW y Serlimar, y tambe di haya beneficio financiero for di empresario Vito Croes.

Esser a rechasa categoricamente cu e la wordo “cumpra”. E la splica cu Vito Croes ta padrino di su yiu y cu ayuda financiero cu e la ricibi tabata di caracter personal y familiar. Hof a mustra diferente mensahe di WhatsApp entre ambos, incluyendo referencia na “envelope cu placa” y comunicacion tocante DOW.

Segun Esser, e conversacionnan tabata relaciona cu actividadnan social y proyecto comercial legitimo. E la insisti cu tur hende cu e la yuda tabata pasa door di procedura normal y cu nunca a discrimina segun partido politico.

Diamars, e caso ta continua cu requisitorio di Procurador General, kende lopresenta su posicion oficial y castigonan cu Ministerio Publico ta busca den apelacion.