Corsou a perde contra Escocia den wega amistoso prome cu mundilal

GLASGOW – Seleccion di Curaçao a cay cu un derrota amplio den un wega amistoso contra Escocia. Cu regreso di entrenador Dick Advocaat, Corsou a perde 4-1 despues cu delantero Jürgen Locadia a ricibi un carchi cora den prome parti di e wega.

Advocaat a laga su puesto como entrenador na februari pasobra di problema di salud di su yiu muher. Fred Rutten a tuma encargo temporalmente, pero despues di su salida, Advocaat a bolbe pa guia Corsou rumbo na Mundial.

Corsou a cuminza bon den Hampden Park na Glasgow y despues di 15 minuut a habri e score. Un pase largo di Riechedly Bazoer a wordo controla elegantemente door di Tahith Chong, kende despues a driblecu velocidad y a marca e 0-1.

Escocia a presiona pa e empate, pero portero Eloy Room a salba su ekipo cu un parada importante. Sinembargo, e situacion a cambia completamente ora cu Locadia a duna un codazo na Aaron Hickey y, despues di revision di VAR, a ricibi carchi cora directo.

Cinco minuut despues, Escocia a logra e empate danki na Findlay Curtis. Den di dos parti, Lawrence Shankland a marca dos gol mas pa pone e score 3-1, mientras cu Ryan Christie a cera e cuenta for di punto penal despues cu Jurien Gaari a comete falta den area.

Corsou awor lo prepara pa un otro amistoso importante contra Aruba prome cu cuminza su participacion den Mundial, unda nan lo enfrenta Alemania, Ecuador y Ivory Coast.