Hoge Raad ta confirma confiscacion den caso di trafico humano na Corsou

DEN HAAG – Hoge Raad der Nederlanden a dicidi cu confiscacion di mas cu 667 mil florin cu a wordo gana ilegalmente den un caso grandi di trafico humano, contrabando di hende y trabou ilegal na Corsou, lo keda vigente.  

E caso tabata relaciona cu un pareha cu tabatin un nightclub na Corsou unda nan tabata trece muhennan venezolano ilegalmente pa traha como “trago girls”. E muhennan tabata traha sin permiso di trabou ni contrato y regularmente mester a traha dia largo pa stimula clientenan cumpra mas bebida. Segun corte, tambe tabatin situacion unda sexo cu cliente por tabata forma parti di e trabou. E muhennan tabata obliga pa biba den un hotel cercano.  

Anteriormente, Gemeenschappelijk Hof van Justitie a condena e pareha pa trafico humano, contrabando di hende y duna trabou na ilegalnan, imponiendo cuatro aña di prizon na cada sospechoso. Ademas, corte a ordena confiscacion di NAf 667.241 pa beneficio ilegal cu nan a haya for di e actividadnan criminal. (hogeraad.nl)

Abogadonan di e condenadonan a busca anulacion di e decision den casacion, alegando cu e calculacion di beneficio ilegal no tabata corecto. Sin embargo, Hoge Raad a rechaza tur e objecionnan y a confirma cu no tin motibo legal pa cambia e decision di e Hof.  

E maximo corte hulandes a conclui cu e reclamonan no a logra demuestra error juridico importante y cu e castigonan y confiscacionnan por keda completamente vigente.