Recherche a detene yiu homber den caso di morto sospechoso na Calbas

NOORD – Un investigacion rapido di Cuerpo Policial Aruba a resulta den detencion di un homber di 44 aña den conexion cu e morto sospechoso di un señora di edad na Calbas.

Dialuna mainta pa mas o menos 7:53, central di polis a ricibi un notificacion tocante un señora cu no tabata duna señal di bida den un cas na Calbas. Polis y ambulance a wordo despacha inmediatamente pa e sitio.

Na yegada, e yiu homber di e señora a informa autoridadnan cu su mama no tabata reaccionando. Personal di ambulance a haci tur esfuerso posible, pero lamentablemente no por a haci nada mas pa e victima.

Docter Texier a confirma morto di e señora C.R. Piñero, di 73 aña y nacida na Venezuela.

Debido na circunstancianan di e caso, Recherche, polis technico (BFTO) y un docter forensico a inicia un investigacion extensivo pa determina si tabatin indicacion di un hecho castigabel.

Durante e investigacion, autoridadnan a ricibi indicacion cu e morto posiblemente no tabata natural. Poco despues, recherche a detene e yiu homber di e fayecida, identifica como E.E.B.P., di 44 aña y nacido na Venezuela, como sospechoso den e caso.

Ademas, durante e operacion, ambulance a wordo yama bek pa brinda asistencia medico na e sospechoso, kende despues a wordo transporta pa tratamiento.

Investigacion den e caso ta continua.

Cuerpo Policial Aruba a expresa condolencia na famia di e señora fayeci. NOTA: E potret ta un dramatisacion di e noticia y no ta un potret real.