GGD: Riesgo ta abou pa e virus di hanta na Boneiru y region Caribeño

KRALENDIJK – A base di mensahenan reciente internacional tocante diferente caso di e virus di hanta riba un barco crucero, GGD Bonaire / Salubridad Publico di Entidad Publico di Boneiru ta informa cu e riesgo pa Boneiru y e region caribeño ta hopi abou na e momento aki.

E mensahenan ta trata tocante un brote di e virus di hanta riba un crucero di expedicion cu a nabega banda di Suramerica y den Oceano Atlantico. Algun pasahero y miembro di tripulante a bira gravemente malo y tambe tin personanan cu a fayece.

No tin caso confirma di e virus di hanta na Boneiru. Tampoco no tin señal cu e virus ta plama den region caribeño.

Segun Caribbean Public Health Agency (CARPHA) y Wereldgezondheidsorganisatie (WHO), e riesgo pa e region ta hopi abou actualmente.

E virus di hanta ta wordo encontra solamente serca algun roedor manera rato y djaca. E tipo di virus confirma den e brote aki ta sosode principalmente den partinan di Chile y Argentina, unda rato y djaca salvashi por transmite e virus. E tipo di roedor ey no ta exista na Boneiru.

Contaminacion generalmente ta sosode via contacto cu urina, sushi of skupi di e roedornan infecta, por ehemplo inhalando stof den area infecta. Transmision di persona pa persona ta hopi raro y solamente ta sosode den situacion excepcional cu contacto cercano y largo.

Segun e organizacionnan internacional di salud, e riesgo pa un pandemia ta hopi chikito paso e virus no ta plama facil entre hende.

GGD Bonaire / Salubridad Publico ta sigui monitorea e situacion den colaboracion cu CARPHA, RIVM y WHO, y lo informa comunidad si tin motibo pa haci esey.