JetBlue ta descarta bancarota, pero Aruba ta sinti e presion financiero

ORANJESTAD – Compania di aviacion JetBlue ta pasando pa un periodo financiero dificil debido na subida fuerte di prijs di combustible, pero no ta considera bancarota pa e aña aki. Asina CEO Joanna Geraghty a indica den un memo interno cu a wordo mira pa agencia di prensa Reuters. Segun e CEO, resultado di e compania americano di vuelo barata ta bou presion pa motibo di costo cu ta subi, en gran parti como consecuencia di tensionnan geopolitico cu a empuha prijs di kerosin pa halto. Sinembargo, Geraghty a enfatisa cu un declaracion di quiebra “no ta riba mesa” y cu e compania ta trahando riba medidanan pa mantene estabilidad financiero.

RELEVANCIA PA ARUBA

E situacion aki tambe ta relevante pa Aruba. JetBlue tin conexion directo entre isla y Merca, specialmente cu ciudadnan manera New York y Boston. Pa Aruba, e routenan aki ta forma un enlace importante pa turismo, principalmente pa bishitantenan di Norte America.

MAS GRANDI CU CORSOU

Na Aruba, rol di JetBlue ta mas grandi cu na Corsou. E compania ta bula regularmente entre Oranjestad y varios destinacion na Merca, cubriendo un parti considerable di mercado mericano, cu ta crucial pa turismo di Aruba. Cualkier cambio den capacidad of ruta por tin efecto directo riba cantidad di bishitante y prijs di ticket. JetBlue ta intenta maneha e presion financiero cu financiamiento adicional y ahuste den su red di ruta. Den sector di aviacion, e desarrollo aki ta wordo sigui di cerca, paso por tin impacto riba conexionnan cu mercado chikito den Caribe. Potret cortesia Garrick Laclé.