Parlamento y gobierno ta choca riba tema di refineria cu amienda aproba unanimamente

ORANJESTAD – Un mocion aproba e siman aki den parlamento den forma unanime, a mustra un biaha mas e ‘disconnect’ cu tin entre gobierno y Parlamento di Aruba. Den Papiamento crioyo, E amienda a keda presenta durante un reunion publico, presenta pa partido di oposicion, pero aproba pa tur den e sala, incluyendo miembronan di coalicion. E tema: possible reapertura di e refineria. Esaki mientras cu algun luna atras (September 2025), dilanti ex prome minister hulandes Dick Schoof, prome minister Mike Eman a anuncia cu fanfaria, cu e refineria definitivamente ta keda cera. 

E MOCION

E mocion di fraccion MEP, presenta durante e reunion riba e tema di problema social di nos adultonan mayor, ta plantea cu “ Un  solucion structural pa crisis den cuido di e adulto mayor  na Aruba ta depende di reforsamento economico nacional, particular via reactivacion di actividad den sector di petroleo y energia regional” . E mocion ta pidi gobierno specificamente pa busca cooperacion cu Merca y industrianan internacional pa inversion den almacenamiento, logistica y refinamento, y cu e ingreso adicional a consecuencia di esaki, mester wordo dirigi prioritariamente na expansion y mehoracion di cuido di e adulto mayor. 

GOBIERNO TA CONTRADECI 

Tabata durante bishita di despedida di e awor ex prome minister hulandes Dick Schoof na Aruba, cu prome minister Mike Eman den un transmission en bibo, a sigura cu “ E refineria Lago na Aruba ta cera definitivamente”. Aki e prome mandatario a sigura e prome mandatario di Hulanda, en bibo pa Aruba tambe scucha y wak, cu ‘gobierno Arubano tin plan pa desmantela completamente e compleho na San Nicolas, na banda sur di Aruba’. E tereno grandi aki lo haya un destino nobo, cu sostenibilidad como e punto central. Hulanda lo yuda cu e desmantelacion y limpieza di e area. Ademas, Eman a bisa cu esaki ta un desicion enorme pa Aruba.

PARLAMENTO TA RIBA OTRO LIÑA

E mocion sinembargo ta mustra un palabra cla, cu Parlamento no ta riba e mesun liña cu gobierno di Aruba y cu e mocion aki, e ta keda demonstra concretamente. Y si tabata un mocion cu a haya solamente sosten di parti di oposicion, cu ta esun cu a bin cu e mocion, esey tabata otro. Pero den e caso aki, 20 parlamentario cu tabata presente, tur a vota pro. Incluyendo parlamentarionan di AVP y FUTURO (uno no tabatey, esta Muzanine Wever:red).