Maduro(MEP): Parlamento no por autorisa Gobierno pa bypass LNT

ORANJESTAD — Parlamentario Xiomara Maduro a critica e intencion di Minister di Finansa Geoffrey Wever pa limita aplicacion di Ley di Normering Topinkomens (LNT) na diferente compania y entidadnan mediante un begunstigend beleid, sin cambia e ley mes.

Segun Maduro, Minister Wever ta pidi Parlamento pa duna un direccion y aprobacion politico pa un medida cu e legislacion vigente no ta permiti. E parlamentario ta argumenta cu, si Gobierno kier exclui cierto entidadnan for di LNT, e mester presenta un cambio formal di ley, acompaña pa e consehonan huridico y financiero necesario.

Maduro a indica cu ainda no ta cla cua entidadnan Gobierno kier exclui, cua lo keda bou di LNT, pakico lo trata nan diferente y con e cambionan lo wordo ehecuta legalmente.

Segun e parlamentario, Gobierno mester presenta prome un solucion cu ta cuadra cu ley y solamente despues pidi Parlamento su opinion politico. Parlamento su funcion ta controla Gobierno, no duna un “cheque blanco” pa bypass un ley vigente, Maduro a enfatisa.