Aruba y Colombia ta explora oportunidad comercial nobo

ORANJESTAD — Aruba a ricibi un delegacion di 19 compania colombiano durante un mision comercial organisa pa ProColombia. E meta tabata conecta empresarionan colombiano cu mercado Arubano y identifica oportunidadnan concreto pa comercio y inversion.

E companianan a presenta, entre otro, producto agricola, fruta y berdura procesa of congela, koffie, cacao, bebida y servicio digital. Nan a bishita supermercadonan local pa conoce miho e oferta, prijsnan, empaquetamento y preferencianan di consumidor na Aruba. Un bishita na ASTEC a duna nan mas informacion tocante transporte, cadena di frio y logistica pa productonan fresco y congela.

Durante Colombia Showroom Aruba, e empresarionan a presenta nan productonan directamente na importador, distribuidor, supermercado, hotel y restaurant. Nan a haya tambe feedback tocante rekisitonan di mercado y posible adaptacionnan.

Segun Minister Geoffrey Wever, Colombia por yuda Aruba diversifica su importacionnan y identifica opcionnan mas competitivo. E meta ta pa e contactonan estableci transforma den comercio concreto y relacionnan duradero.

Desde 2023, Aruba tin Aruba Trade & Investment Office na Bogotá, cu ta sostene comerciante y inversionista interesa den oportunidadnan entre ambos mercado.