Refineria na Aruba ta cera definitivamente, Hulanda ta yuda cu desmantelacion

SAN NICOLAS - E refineria Lago na Aruba ta cera definitivamente. Esaki a wordo anuncia pa premier Eman durante un bishita di su colega demisionario Schoof for di Hulanda.

E gobierno Arubano tin plan pa desmantela completamente e compleho na San Nicolas, na banda sur di Aruba. E tereno grandi aki lo haya un destino nobo, cu sostenibilidad como e punto central. Hulanda lo yuda cu e desmantelacion y limpieza di e area.

Eman a bisa cu esaki ta un desicion enorme pa Aruba.

“Casi un siglo largo e refineria tabata e curazon di e epoca industrial di Aruba,” e premier a bisa mientras cu Schoof tabata na su banda. “Generacionnan di Arubanonan a construi su bida rond di e fabrica aki. Pero futuro ta pidi curashi. Awe nos ta cera e capitulo no solamente cu recordacion di e contribucion di e refineria, sino tambe cu convencion pa habri un capitulo nobo di renovacion, sostenibilidad y bienestar comun.”

Eman a enfatisa cu pone e area limpi y cla pa desaroyo nobo ta “un reto enorme pa un isla chikito manera Aruba,” y e a pidi ayuda di Hulanda den e proceso. 

Schoof a lansa palabra di alabansa pa e desicion “curashi y visionario” di e gobierno Arubano. “Un paso importante na direccion di un economia sostenible y resistente,” segun e premier demisionario. E a bisa cu e ta realisa cu hopi hende na Aruba a traha pa e refineria Lago. “Esaki ta haci cu e desicion aki tin tambe un lado emocional pa e pueblo Arubano. Pero sostenibilidad ta pidi desicionnan cu curashi.”

Hulanda lo pone disponibel 50 miyon euro pa fortifica e red di electricidad di Aruba. Esaki lo permiti cu mas energia solar y di biento por wordo integra den e sistema.

E bishita cortico di Schoof na Corsou y Aruba a tuma luga entre e cumbre climatico na Brasil y un reunion internashonal na Colombia. E tambe a promete decenan di miyon pa Corsou pa fortifica su red electrico pa habri caminda pa mas energia sostenible.

Durante e bishita, nan tambe a toca e tensionnan den region Caribense.

“Mi a enfatisa cu Hulanda no ta involvi den accion militar di Merca den e region,” a bisa Schoof despues riba media social. “Nos ta sigui monitorea e situacion di cerca y ta keda den contacto estrecho cu e premiernan di e paisnan den Reino.”