Gobierno di Corsou ta pone 87 miyon florin pa garantisa fondo pa CMC den proximo añanan

WILLEMSTAD - Durante su disertashon na okashon di ‘Dia Internashonal di Enfermeria’ Minister Javier Silvana enkargá ku Salubridat Públiko, a duna di konosé ku pa evitá ku entre otro kalidat di kuido ta baha òf ku trahadónan mester traha den un hospital ménos optimal, ta tumando pasonan konkreto.

Silvania a splika ku a apartá 87 mion florin pa garantisá ku tin e fondonan nesesario pa den e próksimo añanan por sigui hasi invershon den aparatonan médiko i den e edifisio di CMC. E forma ku lo hasi e invershonnan ya a keda palabrá ku e gerensia di CMC Vastgoed i den korto tempu lo terminá ku e formalisashon di e plannan aki.

E fondonan ku CMC ta risibí serka SVB a keda oumentá den 2025 konforme e presupuesto 2025 ku CMC Exploitatie a entregá. Ta asina ku esaki a keda integrá di forma struktural den presupuesto di SVB i tambe di Pais. Esaki ta nifiká ku CMC lo haña 58 mion èkstra den 2025 i 2026 (inkluyendo e ‘doelmatigheidsbesparing’ di CMC mes).

Entrante 2027 esaki lo bira 68 mion. Den e fondonan aki tin un suma èkstra di 3 mion ku a keda asigná pa mehorashon di e kondishonnan laboral di e empleadonan di CMC. E fondonan aki mester keda usá dor di CMC pa kumpli ku obligashonnan di kuido inkluso e ‘arbeidsvoorwaarden’ di e trahadónan.

Pues, CMC mester usa e fondonan aki pa ofresé e kuido akordá, pa duna e konsultanan palabrá, pa realisá e operashonnan akordá i pa kumpli ku e CAO. Ta importante pa usa e fondonan aki pa reklutá sufisiente personal kualifiká, pa garantisá kalidat di kuido, pa paga oranan di ‘overtime’ i pa prevení un lista di espera muchu largu. Sr de Graaf, Direktro nobo di CMC, ta dunando e impreshon ku e lo sòru pa esaki sosodé tambe, Silvania a enfatisá. NOTA: E texto ta scirbi den Papiamento fonetico di Corsou.