Corte: Gobierno no por aplica ley di LNT pa directornan di Horacio Oduber Hospital

ORANJESTAD – Den un sentencia cu por tin basta embergadura pa mas instancia local, Corte diaranson a hala atencion di gobierno di Aruba un banda, y pone e ley Landsverordening Normering Topinkomens un banda pa e dos directornan di hospital Horacio Oduber. Esaki ta e ley cu ta regula cuanto maximo un persona cu ta gana un salario di e.o. director di un compania, por gana maximo. Y a usa e filosofia cu e no por gana mas cu 150% cu salario di prome minister di Aruba. Den e sentencia aki, e ‘flie’ no a subi y huez a ‘pone e ley un banda’ y cu e ley tin ‘consecuencia cu ta bay mucho leu’. 

E CASO

Tabata e fundacion SZA (Stichting Ziekenverpleging Aruba) y e dos directornan di hospital cu a entama e caso contra gobierno di gobierno, cu a keda representa pa e abogado mr David Kock. Remarcable ta cu gobierno den e proceso, no a reacciona apropia, of no a reacciona mes, cu ta nifica segun Corte, cu gobierno a perde e derecho pa entrega un conclusion di contesta. Ademas, gobierno no a disputa e demanda, cual demanda no ta ilegal y ta wordo como tal otorga. 

HECHO ILEGAL

Tambe ta asina cu Corte a haya e LNT, sin un motibo pa urgencia financiero, pa reduci e gasto di gobierno, contra articulo 1 di EVRM, y ta comete un acto ‘ilegal’ contra e demandantenan. Ademas, Corte ta haya cu durante e proceso di calcula e salario total di prome minister, a ekiboca cu e pensioen, e parti di trahado pa loke ta e cargonan social y a omete e uso di e auto di trabou, pa uso priva, pa cual e calculacion di e limite di salario di AWG 329.000 ta incorecto y ilegal pa cu e demandantenan. Tambe, Corte ta mustra cu e hecho cu kier aplica e tempo di introduccion di 2 aña envez di 4 aña manera cu ta e caso na Hulanda, tambe ilegal. Y finalmente, cu lo determina un procedura di daño y perhuicio pa e daño causa na e demandantenan. Pa e sentencia, click AKI.