Fundacion Epilepsia Aruba ta bek despues di tabata inactivo

Posted on 03/26/2025 9:52 am AST | Updated on 03/26/2025 9:53 am AST

ORANJESTAD – Fundacion Epilepsia Aruba ta oficialmente bek despues di un tempo di inactividad. Fundacion Epilepsia Aruba tin un directiva nobo cu un compromiso fuerte pa amplia conocemento y sosten pa hende cu epilepsia y nan sernan keri.

E lansamento oficial di e fundacion ta awe, 26 di Maart 2025, cu ta 'Purple Day', un dia mundialmente reconoci pa conscientisacion di epilepsia. Esaki ta marca e inicio di un acercamento mas activo pa educa nos hendenan, duna sosten na personanan cu epilepsia y reduci e pensamentonan negativo rond di e condicion aki.

DICON 'PURPLE DAY' TA IMPORTANTE?

'Purple Day' a wordo funda na 2008 pa Cassidy Megan, un hoben di Canada, pa amplia conocemento global di epilepsia y pa laga hende cu epilepsia sa cu nan no ta nan so. Un dia importante ariba cual miembronan nobo di Fundacion Epilepsia Aruba ta bolbe lanta e fundacion y ta reforsa su mision pa haci e condicion di epilepsia mas comprendibel den comunidad.

Iniciativa pa Futuro

Parti di e vision nobo ta inclui varios programa y proyecto manera:

• Seizure Smart Aruba: Educacion publico y entrenamiento di prome ayudo pa atake di epilepsia.

• Purple Lights Aruba: Un campaña visual pa ilumina edificionan publico na color biña.

• Epilepsy Voices: Un iniciativa di historianan real di parti di esnan cu e condicion aki.

• Programa di Radio y TV: Como campaña di conscientisacion pa kibra pensamento eroneo tocante epilepsia y duna sosten na personanan y sernan keri cu epilepsia.

• Purple Gala Dinner – Pa recauda fondo pa proyectonan den futuro.

Fundacion Epilepsia Aruba ta contento di por la bek pa sirbi comunidad di Aruba, reforsando asina e compromiso di conscientisacion cerca e poblacion en general.

Pa mas informacion tocante Fundacion Epilepsia Aruba por comunica pa medio di e email: [email protected] of riba social media: @FundacionEpilepsiaAruba