Stichting Musica a anuncia Band of the Year pa 2025

ORANJESTAD - Stichting Musica a scohe Groove Masters como Band of the Year pa 2025. Segun Musica,  Groove Masters a destaca durante di e evaluacion di hurado y como Band of the Year ta gana e suma di Afl.5000,- como premio. Groove Masters a destaca cu un bon calidad di sonido, tremendo animacion cu un repertorio di cancion nobo y clasico y cu un presentacion cu a impresiona nos comunidad en general.

E premio pa Band of the Year lo wordo entrega durante e Prize Award Event di Stichting Musica.

Un pabien ta bai di parti Stichting Musica pa tur banda musical cu a participa na Aruba Caiso & Soca Monarch su Soca Finals 2025 y tambe na e paradanan di Carnaval 71. Basa riba e criteria di Band of the Year cu Stichting Musica ta mantene, un cuerpo di hurado distribui riba e rutanan di Carnaval a evalua cua ta e banda cu a contribui mas durante Carnaval 71.

KICO TA E CRITERNAAN

E criteria ta lo siguiente:

▪ E banda mester a participa na “Aruba Caiso & Soca Monarch su Soca Finals 2025” y/of den “Festival di Tumba 2025”

▪ E banda mester a participa entre e siguiente parada nan di Aruba su Carnaval 2025:

- Parada di Luz na San Nicolas

- Lighting Parade Oranjestad

- Parada di Jouvert Morning

- Parada Grandi di San Nicolas

- Grand Parade Oranjestad

▪ E banda cu miho animacion den parada nan

▪ E banda su zonido

▪ Presentacion di e banda su trailer den e paradanan

▪ E banda mester toca e Soca ganador di Aruba Caiso & Soca Monarch – Soca Finals 2025 “1 For Unity” of e Tumba ganador 2025 “Ban Cumi”.