Misha Raymond y Carlos Guiamo no ta forma parti mas di RAIZ

ORANJESTAD – Partido RAIZ ta perde dos miembro crucial awor cu eleccion ta tras di lomba. Diaranson mainta e partido a anuncia riba su pagina di Facebook cu tanto Raymicheline “Misha” Raymond y Carlos Guiamo, candidatonan riba e ultimo lista di RAIZ, no ta forma parti di e plataforma mas. “Nos ta gradici ambos pa nan colaboracion y dedicacion durante nan tenura cu RAIZ y ta deseanan tur clase di exito”. E motibo di nan retiro no ta conoci, exactamente pero e partido a anuncia un periodo di reorganisacion y restructuracion di e partido. “Como parti di e proceso aki nos ta anuncia  cu tanto Raymicheline “Misha” Raymond y Carlos Guiamo, candidatonan riba e ultimo lista di RAIZ, no ta forma parti di e plataforma mas” e mensahe di e partido ta bisa. 

PARLAMENTARIO Y CONSEHERO

Durante e ultimo tres aña y mei, Raymond a fungi como e lider di fraccion di e partido den Parlamento y Guiamo tabata e consehero principal di e partido. E partido a bisa cu awor cu temporada di campaña y dianan di fiesta a pasa plataforma RAIZ lo duna tur espacio y cooperacion pa e proceso di formacion di gobierno nobo por cana na un forma organisa y conforme locual ley ta prescribi. 

TRASPASO DI CARTERA

RAIZ ta preparando tambe pa e traspaso di cartera por bay na un forma debido y elegante, como debe ser. Mientrastanto, Plataforma RAIZ ta keda desaroya su mes y no ta para keto. Pueblo di Aruba a manda un señal cla pa nos plataforma y nos a cuminsa cu e proceso di reforma y reorganisa nos mes en preparacion di un proximo eleccion.