Ponson: Otro siman diabierna ta cuminsa bende klapchi, pero sin pagara!

ORANJESTAD – Tur cos ta cla pa otro siman diabierna 27 di December, benta di klapchi cuminsa na Aruba. Pero sin pagara. Asina experto di explosivo Rubin Ponson a confirma diahuebs pa Noticiacla. Tin un total di 8 container di klapchi (vuurwerk) a bin e biaha aki, pero for di Merca, cu algun assortment (variacion di klapchi), y nan lo bay hunto cu a sobra aña pasa pa benta na publico, locual segun Ponson, no ta hopi. Y e biaha aki, manera cu Noticiacla a presenta como primicia na oktober caba, no tin container for di China, cu ta e motibo primordial pakico no tin pagara e biaha aki pa Aruba. 

SCARSEDAD TOTAL

“Hopi tiki mes, si nos compara cu añanan anterior, dus nos por papia di scarsedad di klapchi” Ponson a sigui bisa. Esnan cu kier tira flowerbed of otro tipo di vuurwerk, manera vuurpijl. “Pero no tin pagara! Pagara cu tin aworaki ta un cantidad hopi chikito, cu ta 2 of tres pagara cu ta bendi caba, y algun di 200 mil tiro, pero casi nada. Pesey por bisa cu mientras cu aki aya tin, e realidad ta cu no ta bay tin pa publico, sino solamente algun pa instancia cu a cumpra esaki caba. 

TUR COS TA CLA Y NO TIN CAMBIO MAS 

Esey ta e situacion real segun e experto y no ta bay tin cambio. “Ya e pagonan a wordo haci riba tur importacion, riba tur e opslag ruimte, y e preparacionan a cuminsa entre departamentonan pa e dia pa saca klapchi cu ta bira dia 27 di december. Dus nos por bisa cu tur cos ta afgerond aworaki!” Ponson a sigui bisa. 

PUNTO DI BENTA A BAHA

Ponson a bisa tambe cu e puntonan di benta a baha. Pa pone den perspectiva, Ponson ta compara cu añanan anterior unda cu tabatin p.e. 65 punto di benta. “Aworaki nos a haya peticion pa 48 (punto di benta). Di eseynan, hopi ta cay afo na caminda. Esaki ta pa motibo cu na ultimo ora ta dicidi pa toch no bay bende, of nan ta bende otro caminda, of ta join cu otro pa bende nan klapchi” Ponson a sigui bisa. Ademas e ta splica cu tin varios di nan a pidi nan permiso pasobra e ta mara na un deadline pa bo pidi, cu ta mitar di November. Tin a pidi pa bende, en espera si ta logra haya klapchi. “Mi ta calcula cu for di e cantidad cu a wordo pidi, ainda tin un cierto cantidad cu ta bay cai afo y cu no ta bay usa nan permiso of no ta ni busca e permiso pa bende. E cantidad di punto di benta enberdad ta menos cu e añanan anterior!” Ponson a finalisa bisando. 

KICO TA FLOWERBED

Pa esnan cu porta no sa ‘ainda’, flowerbed ta e tipo di cahanan cu ta bin cu diferente tubo den dje, y cada tubo ta saca un of dos tiro cu ta bay den halto, manera un tipo di ‘batata chikito’, cu ta saca colornan bunita den halto. “Tin di nan ta sake abou, al estilo fontein. Tin diferente tipo di flowerbed.