CMO: Prome minister ta e unico autorisa pa dicidi si e isla ta haya alerta pa tormenta of horcan

ORANJESTAD – E aña aki, cu un temporada super activo di horcan pronostica, e director di Crisis Management Office (CMO) Rino Hermans a bisa cu lo tin cambio con pa raporta esaki. Entre nan, a splica cu prensa lo haya un trabou mas activo y como tal ta mas miho informa e biaha aki. Entre e cambionan, ta aloca un sitio exclusivamente pa prensa na e centro di CMO, unda cu prensa por haci su trabou ora cu ta necesario. Ta considera prensa como e aliado mas principal di CMO, ya cu nan tin e tarea oficial di suministra e informacion pa comunidad y esaki ta e miho forma di opera. 

CON PA ACTUA ORA DI HORCAN

Segun Hermans, ta vigila tur sistema tropical, y asina cu nan pasa Barbados, ta drenta den un alerta special di 48 ora unda cu por cuminsa duna alerta si ta necesario. Loke ta hopi importante pa sa, basa riba pregunta di Noticiacla, ta cu e unico cu por duna alerta pa un tormenta of horcan, ta prome minister di Aruba, cu na su turno ta pase pa CMO. E ora den cooperacion estrecho cu National Hurricane Center na Miami, ta haci e anuncio oficial di e situacion pa nos isla. Pues ora cu mira cu NHC ta pone Aruba riba un lista di sea warning of watch, esaki ta pasobra ta ARuba a duna e ok pa esaki sosode, y no a y of por haci esaki riba nan mes. Segun Hermans, loke si NHC por haci ta conseha Aruba kico mester haci y si ta ok pa pone alerta sea ta warning of watch.