Gobierno di Corsou ta bini bek aki 1 luna pa contesta preguntanan riba ENNIA

WILLEMSTAD - Promé minister Gilmar ‘Pik’ Pisas a pidi 1 luna di tempu pa por bini bèk pa duna kontesta den ekstenso na parlamento riba e ENNIA Caribe Leven. “Ainda no tin hopi informashon pa duna”, Pisas a bisa ayera nochi na final di reunion públiko di parlamento.

Despues ku parlamentarionan pa mas ku 5 ora largu a papia i hasi pregunta gobièrnu a duna un splikashon den detaye na unda e negosiashonnan ta na e momentonan aki. Segun Cooper durante un deliberashon ku a tuma lugá ayera mèrdia ku sekretario di estado di Hulanda, Alexandra van Huffelen a logra ku na momento ku e komishon tékniko (konsistiendo di Kòrsou, St. Maarten i Banko Sentral) ku ta atendé ku e problemátika di ENNIA yega na un desishon final riba e terminashon den fase di e kompania, ku e interes ku ta kobra riba e refinansiamentu di e fiansa di likides durante pandemia di Corona ta baha di 5,1 porshento ku e ta aktual te na 3,1 porshento.

Ku esaki a logra ku ta eliminá e kondishon ku Hulanda mester aprobá e desishon final riba ENNIA promé ku ta ahustá e interes. “E diferensia entre 5,1 i 3,4 porshento ta 1,3 mion florin pa luna”, Cooper a splika. Pisas a añadí bisando ku esaki ta e motibu ku ta traha duru pa den un luna di tempu ta kla ku tur kalkulashon pa asina no mester sigui paga 1,3 èkstra pa luna na interes.

“Ta pa e motibu aki mi ta pidi parlamento su indulgensia pa nos bini bèk i duna tur informashon. Ta trahando duru pa den ménos ku un luna kaba ku tur e kalkulashonnan p’asina tin un bista eksakto ta kuantu e terminashon ta kosta i kon ta bai paga esaki inkluso posibel kontribushon di Banko Sentral ku pago di dividendo”, Pisas a bisa. Tambe el a sigurá ku e desishon final ta keda den man di parlamento pa aseptá e loke kumbiní komo solushon pa ENNIA.

Segun Pisas ta bèrdat ku na promé instante gobièrnu ke a yega na un “doorstart” pa ENNIA, pero ta despues ku a hasi tur e kalkulashonnan gobièrnu a disidí di kambia su punto di bista i skohe pa un terminashon di e kompania di seguro garantisando pago di penshun di tur kliente. Pisas a primintí ku aki un luna ora kontestá parlamento, profeshonalnan lo duna splikashon di tur sifra i kalkulashon ku a hasi.

Relashoná ku e palabrashon ku ta tene silensio mediátiko rondó di ENNIA i ku ta motibu ku Pisas 17 sèptèmber a bisa ku e no ta bini parlamento, el a splika ayera ku el a tuma e desishon aki despues di a tuma nota den medionan lokal kuantu tabata skibi riba ENNIA i kon diferente persona tabatin un opinion òf solushon pa e problemátika. Esaki sinembargo ta un splikashon diferente for di loke el a bisa den su karta di 17 sèptèmber pa parlamento.

Cooper di su parti tambe a duna splikashon ta kon e deliberashon ku Van Huffelen a bai riba 10 òktober ku tabata e “deadline” pa firma pa aprobashon di e refinansiamentu di e fiansa di likides. Segun Cooper Van Huffelen tabata poniendo hopi preshon pa e firma  akuerdo di refinansiamentu promé ku  or di atardi ora di Kòrsou.

“Mi a bisa Van Huffelen ku mi no por hasi esei pasobra mi no tin un Konseho di Minister huntu pa tuma un desishon. Van Huffelen a keda pone preshon ku mi mester firma sino Kòrsou mester paga e 911 mion florin inmediatamente. Bosnan mes sa. Serka mi bo ta na e adrès robes ku e tipo di menasanan aki pasó tur ‘fuse’ den mi kurpa ta bula.”

Cooper a sigui splika ku na e momento aki el a bisa Van Huffelen ku e  ta firma e karta bou di 3 kondishon, esta ku Konseho di Minister ta aprobá e refinansiamentu despues, ku te asina leu ta nesesario parlamento tambe ta aprobá e refinansiamentu i ku e interes di e refinansiamentu ta bira 3,4 porshento ku forsa retroaktivo te 10 òktober 2023. “Despues di hopi bai bin Hulanda a aseptá ku mi a firma e karta bou di protesta, esta mará na e 3 kondishonnan.”

E siguiente dia, Cooper a sigui bisa a surgi otro diskushon riba interpretashon di Van Huffelen riba e di tres kondishon. “Gobièrnu di Kòrsou a keda para riba ku no ta aseptabel ku Hulanda ta kondishoná e tasa di interes riba e refinansiamentu na nan aprobashon di e akuerdo riba ENNIA, pasobra Hulanda no ta partido den problemátika i solushon pa ENNIA i ta esei nos a logra awe den e negosiashonnan mèrdia ku e tasa di interes ta baha na momento ku Kòrsou, St. Maarten i Banko Sentral yega na un desishon final riba terminashon di ENNIA.”NOTA: E texto ta scirbi den Papiamento fonetico di Corsou.