Na Corsou, aseguradonan di ENNIA ta preocupa pa nan penshun ta sinti falta di informacion

WILLEMSTAD - E preokupashonnan rondó di futuro di ENNIA Leven Caribe, pero tambe konsekuensianan pa gobièrnu i komunidat en general ta kresiente. Despues di e kontesta di sekretario di estado, Alexandra van Huffelen i e komunikado di Banko Sentral di Kòrsou i St. Maarten (CBCS), a haña e konfirmashon ku gobièrnu di Kòrsou a bandoná idea pa yega na un “doorstart” di  ENNIA Leven Caribe i a skohe pa den próksimo 25 pa 30 aña yega na terminashon kontrolá den fase di e kompania di seguro.

Van Huffelen asta a bisa ku e desishon di gobièrnu a kai na último momento mirando ku te djabièrnè 29 sèptèmber ainda promé minister Gilmar ‘Pik’ Pisas a indiká na gobièrnu Hulandes ku ta skohe pa un “doorstart” di ENNIA, pues ku lo aseptá e oferta di fiansa serka gobièrnu Hulandes pa 1.2 miar florin.

Algun persona ku un pólisa na ENNIA Caribe Leven i ku ta preokupá, ta puntra kiko e terminashon kontrolá den fase ta nifiká pa esnan ku a spar i ta kobrando penshun na ENNIA i tambe pa esnan ku ta spar aworakí pa un penshun den futuro. “No tin sufisiente informashon pa nos ku tin interes den e kompania.”

Minister di Fiansa, Javier Silvania ta bisa riba su página di Facebook ku den silensio el a traha huntu ku Pisas pa yega na un solushon pa ENNIA sin ku ta bai na rudia i fia sèn serka Hulanda. E solushon aki ta ku gobièrnu ta bai pone pa un periodo di 25 pa 30 aña un suma di 30 mion florin anualmente pa paga penshonadonan di e kompania.

For di seno di gobièrnu ta komprondé ku na ministerio di Finansa ámtenarnan ta puntra nan mes ta for di unda ta bai saka strukturalmente 30 mion florin pa aña for di “gewone dienst” di presupuesto di pais pa hinka den ENNIA. Un èks bankero ku ta preferá di keda anónimo ta splika   ku e solushon ku gobièrnu a skohe pa ENNIA ta inkomprendibel.  

“Si gobièrnu tin 30 mion florin pa aña pa hinka den ENNIA, anto mester a aseptá e fiansa di 600 mion euro ku Hulanda a ofresé pa sania ENNIA i hasi e kompania solvabel.” Segun e èks bankero ta splika, “lógiko ta ku ta usa e 30 mion pa paga e fiansa bèk miéntras ku ta kobra Hushang Ansahry konforme desishon di korte pa paga yuda paga e debe kuné. Loke ENNIA mes produsí òf loke haña for di benta di ENNIA tambe por usa pa paga debe kuné.”

Di e forma, segun e èks bankero e kompania ta keda eksistí i gobièrnu tin ku paga muchu ménos ku e 30 mion pa luna. “Pero ku e terminashon den fase di ENNIA Caribe Leven gobièrnu ta paga sin ku ta keda nada atras.”

Frakshonnan si PAR, MAN i TPK for di 14 sèptèmber a pidi un reunion un reunion públiko riba ENNIA, pero te ainda presidente di parlamento no a yama e reunion miéntras ku aseguradonan ta keda den un insertidumbre kiko ta bai pasa ku nan penshun. NOTA: Texto scirbi den Papiamento fonetico di Corsou.