Henriquez (ATIA): Comerciantenan chikito ta hisa prijs di producto awor cu BBO na frontera, pa por sobrevivi

ORANJESTAD – Ora cu director di Aruba Trade & Industry Association (ATIA), Herrick Henriquez bisa cu comerciantenan ta hisa prijs awor cu a introduci BBO na frontera, e ta referi mas hopi na comerciante chikito. Asina e la bisa den e programa Noticiacla LIVE diahuebs anochi cu moderador Tito Laclé. Segun Henriquez, comerciantenan chikito cu no tin un buffer financiero pa wanta te ora cu nan haya e placa bek di DIMP e proximo luna, ta haya nan mes obliga di subi prijs pa asina genera mas entrada y traha nan buffer. Y segun Henriquez, esaki su propio miembronan cu ta afecta, ta informé. Mientrastanto nan ta conciente cu e ley a pasa y tin cu siña biba cu ne. Esey no ta kita afo cu nan lo sigui ta alerta y traha riba e cambio di reforma corecto cu mester tuma lugar. 

COMERCIANTE CHIKITO

Segun Henriquez, e comerciante ‘grandi’ cu tin un buffer financiero, por wanta e ‘sla’ ora cu e tin cu paga BBO riba e producto na frontera, sin cu e la bende esaki ainda. Y e por wanta te ora cu DIMP paga nan esaki bek e siguiente luna. Nan no ta sinti e sla financiero ey. E problema ta cu companianan chikito cu ta biba di luna pa luna, no tin e fondo financiero pa wanta esaki. Ora cu nan paga e BBO na frontera (banda di invoerrechten), nan ta cay den un bashi cu no a conta ariba y como tal ta cobra e cliente extra, pa asina crea un fondo pa nan por sobrevivi.