Gobierno ta preparando contesta pa Corte den caso di Secrets Hotel

ORANJESTAD – Gobierno di Aruba ta finalisando e contesta pa Corte, den caso di e asunto di Secrets Hotel, unda cu huez a pidi pa substancia e ponencia di gobierno riba e keho di un grupo di habitante di Seroe Colorado contra e proyecto. Asina prome minister Evelyn Wever Croes a bisa diabierna den un reaccion corto riba e tema. Segun e mandatario, Secrets ta un proyecto cu gobierno ta kere den dje. “Nos ta kere cu esaki lo trece e desaroyo cu San Nicolas tin mester” e mandatario a sigui bisa. 

CORTE

MAnera ta conoci, gobierno ta den corte cu un grupo di habitante cu ta protestando contra di e proyecto pasobra e proyecto no ta cumpliendo cu cierto regla di medio ambiente y e plan di construccion. Nan tin problema e.o. cu e proyecto ta mucho cerca di nan propiedad, y ta blokia nan bista cu nan tabatin ora cu nan a traha e casnan na Seroe Colorado. Den un demanda nan a keha cu lo no tin e permisonan necesario y asina tin un serie di punto cu nan a reclama den corte di LAR. Gobierno a desmenti esaki y a bringa nan, pero den un sentencia recien, huez a duna e habitantenan razon den nan reclamo, y a ordena huez pa den un periodo specifico, contesta y hustifica nan argumentonan cu nan tin. Mientrastanto no por sigui cu e proyecto, pa cual e proyecto aworaki ta para.