Grupo di Seroe Colorado ta bisa di kier balansa entre bienestar y desaroyo di hotel Secrets

SEROE COLORADO - E residentenan di Seroe Colorado cu ta biba banda di e tereno erfpacht, na unda construccion di e hotel ta tumando luga, kier un balans entre e bienestar di e habitantenan y e desaroyo, na unda ta evita confrontacion y nan por biba den harmonia den e mesun bario na unda e desaroyo aki ta tuma luga.Asina nan a bisa recientemente den un reaccion riba e decision di corte riba e caso. 

E CASO Y NAN REACCION

E residentenan a bisa di a tuma nota di e decision di Corte di 7 juli 2023, den cua hues a ordena e minister pa tuma un decision nobo riba e permiso di construccion, na unda mester tene cuenta cu e obhecionnan di e residentenan.

NO TA CONTRA DESAROYO

E residentenan local di Seroe Colorado a bisa explicitamente cu nan no ta contra desaroyo den Seroe Colorado, pero nan ta pidi atencion pa un balans entre e bienestar di e habitantenan y e desaroyo, na unda ta evita confrontacion y nan por biba den harmonia den e mesun bario na unda e desaroyo aki ta tuma luga.“Lamentablemente e espacio den e bario ta limita, pues mester planea e desaroyo debidamente” nan ta sigui bisa. Ademas nan ta bisa cu ya caba nan ta experiencia molester y disturbio pasobra segun nan splicacion, e residentenan ta bibando mescos cu nan ta biba riba un tereno grandi di construccion durante e trabounan ta den ehecucion cu repetidamente y sin aviso ta tumando luga (tambe parcialmente) durante fin di siman y den marduga (03.30 am). Y na unda truck grandi di cement ta produci hopi desordo y zonido, particularmente pasobra e ta bay den combinacion y na mesun ora cu luz fel cu instala di tal forma cu durante oranan di anochi ta ilumina te penetra e casnan.

E grupo di residente local ta señala entre otro tambe e situacion cu ta existente ya pa hopi aña den otro parti di e isla, esta na unda hotelnan grandi mester ta situa den tal forma planifica (entre otro a base di e plan di zonificacion “Sasaki Associates” di añanan ‘80), cu e casnan mas cerca mester ta situa riba distancia di minimalmente 300 meter, pero hopi biaha 400 meter, mientras cu na Seroe Colorado e hotel masivo ta planea riba solamente 25 meter di e parcelanan residencial. Esaki cu tur su concecuencianan negativo. “ Nos ta kere cu no por yega na un solucion door di solamente emplea huristanan, pero cu mester consulta expertonan di desaroyo independiente y experiencia” e grupo ta finalisa bisando.