Sospechoso (Kevin S.) di a mata e yiu di Corsou na Hulanda a entrega su mes

WILLEMSTAD/ DEN HELDER  - Ayera e hòmber Kevin S. di 26 aña a entregá su mes na polis, despues ku ta sospech’é di a tira e yu di Kòrsou Lavernie Martis di 25 aña ku tabata biba na Alkmaar mata, djasabra último na e siudat di Den Helder na Hulanda. Durante e tiroteo dos persona mas a keda heridá.

Segun fuente hulandes, kousa di e tiroteo tabata relashoná ku diskushon ku un hende muhé.

Aparentemente frei di Lavernie a keda molostiá pa e hòmber Kevin, ku a kondusí na un diskushon. Esei tabata motibu ku Kevin a saka su arma di kandela  i lòs bala riba Lavernie ku a kue den garganta.

E otro personanan ku no tabatin nada di aber, a haña bala den barika i otro partinan di nan kurpa.

Polis huntu ku e tim di ambulans i tambe e personal di servisio di trouma, a presentá ku urgensia na e sitio i a transportá Lavernie via helikòpter pa hospital, pero lamentablemente e no a resistí i a fayesé despues di algun ratu.

E otro víktimanan ta for di peliger. Despues di e tiroteo polis a kuminsá ku un investigashon i na e sitio mes a haña sa ken tabata esun ku a tira, despues ku testigunan a revelá ku ta Kevin.

Polis a hasi petishon riba Kevin su paradero. Segun algun fuente di informashon, despues di e suseso Kevin a hui bai skonde na kas di un amigu, pero esaki no tabata presente na kas na e momentonan ei.

El a tuma kontakto ku e amigu, pero esaki tabata kompletamente fuma. Ora ku e amigu a bin bei e siguiente dia, el a tuma kontakto dirèkt ku polis. Na e momento ei Kevin a hui bai fo’i su kas. Segun otro fuentenan di informashon, tabatin vários persona ku a manda menasa abiertamente pa Kevin i a bisa ku nan lo bai busk’é na su kas.

Ayera den oranan di anochi Kevin a presentá na polis kaminda el a entregá su mes.

Kevin no ta deskonosí pa hustisia, pa motibu ku na aña 2021 el a keda detené pa intento di asesinato, despues ku polisnan a rekonosé via imágennan di kámara huntu ku un otro hòmber, kendenan a basha bala riba un bibienda.

Debí na insufisiente prueba, el a keda poné den libertat algun tempu despues.

Aworakí e ta den isolashon i tin mag di tin kontakto solamente ku su abogado.NOTA: E texto ta scirbi den Papiamento fonetico di Corsou.